الزحام فوروكو مول على طاطي. علاش ما مربينش

اليوم في موركو مول سمعت ان كانت اضرار مادية وحالات اغماء، السبب اليوم الافتتاح ديال واحد الماكازا جديدة ودايرين قسيمة شراء ديال 500 درهم ل 100 كليان الأولين / رجعوها لالف كليان/.
والفيديو انتشر ديال الناس واقفين عند الباب مزاحمين و كيتدافعو ، غير تحل الباب بانو ليك الناس كيتجاراو والعيالات بالفولارات وجلالب اللي قادا تجري و اللي ماقاداش يدفعوها ويزيدو !!!! واللي يطيح و اللي ينوض و اللي طالع في الدروج المخصصين للنزول !!! والرجال تاهوما ، يعني واحد الروييييينة تشوف هاد الناس غادين في الزنقة تسحابهم غير بعقلهم تشوف الفيديو تقول بااااز …. والمشكلة راه هاد العرض غير من لحيتهم يلقمو ليهم لان الاثمنة تقارب 500 درهم .
في الصراحة الفيديو اللي منتاشر في الصفحات اللي منهم صفحتي ماكيضحكش كيبكي ……..
اواااااااه وصلنا تالهاد الدرجة…. غادي نقول قبح الله الفقر راه 500 درهم والعيد قريب ولكن راه ماغاديش ياخدوها راه غير قسيمة شراء . واااااايلي واش هاد الحالة كاملة على بياسة ولا جوج ينعل بو الشراوط المشكل راه ماشي غير جوع النفس لاااااا راه المشكل اعمق بكثييييير ….
مشكل التربية جاي من الدار ومن المدرسة ، كانت المدرسة شعارها التربية قبل التعليم على الاقل المدرسة اللي قريت فيها في الابتدائي ، وااااااافينك امدام بن جلون هاد السيدة كانت مديرة المدرسة كنوجه ليها الشكر الجزيل اللي علماتنا الانسانية والانضباط والنظام والعدل .
باقا نعقل اول يوم في المدرسة واحد البنت ضرباتني في الاستراحة وانا ماكنتش كنعرف الفرق بين المعلم والكاتبة و المديرة والحارسة ، كنت كنعرف غير ان المديرة هي باها، هي اكبر سلطة في العالم ، مشيت نجري لمكتب المديرة الكاتبة او السكريتيرة قالت ليا تفضلي اشنو المشكل ؟؟ قلت ليها مشكل خطير وبغيت نهضر مع المديرة ، بقات كتشوف فيا وجاتها الضحكة كتشوف فيا قد إصبع الابهام وكنهضر على مشكل خطير ، دخلاتني عند المديرة وهي كتضحك من جرأتي و من الطريقة باش كنشرح الموقف وقالت للمديرة هاد البنت عندها مشكل خطير بغات تعضر معاك ، المديرة ابتسمات وهي فيها الضحكة، وقالت ليا اشنو واقع شرحي ليا ؟؟؟ عاودت ليها ان بنت دفعاتني وضرباتني وانا مابغيتش نضربها حيت احنا في المدرسة ماخاصناش نضاربو والى ماضربتيهاش غادي نضربها حيت مانسمحش في حقي بالحرف هذا كان كلامي ، لقيتها جمعات الضحكة وقالت ليا برافو عليك انك جيتي عندي وماضربتيهاش المشكل فعلا خطير عندك الحق اجي معايا ، وداتني وريتها البنت و جمعاتنا كاملين وعيطات للبنت وقالت لينا احنا في المدرسة عندنا نظام، اللي ضربات شي واحدة كتتعاقب ، وقالت لهاديك البنت ماغاديش تلعبي في استراحة اليوم و ملي غادي دخلي للقسم غادي تبقاي واقفة ووجهك في الحيط عقابا ليك ماشي اخلاق ضربي صاحبتك ودفعيها . عطاتنا درس في الاخلاق على موقف بسيط ظاهريا ولكن باطنيا عميق عطاتنا درس في العدل و الانضباط والنظام بقى معانا طول العمر .
وكان الصف والانضباط والاحترام كندخلو للقسم بالصف ومشادين من ايدينا وهي واقفة على جميع الاقسام و الكاتبة واقفة على الدروج وكل قسم واقفة عليه الاستاذة ديالو ، طبعا بأمر منها ماكاين دفيع ماكين فوضى تربينا على هاد الانضباط و بقينا عليه ولعلمكم قريت في مدرسة المخزن ماشي الفلوس .
هاد الناس كون ترباو على النظام ماغاديش يديرو هاد الحالة ، المشكل في التربية دافيع في الطوبيس وفي اي مكان الصحيح يدوز ، الحمدلله انني تعلمت نخلي اللي كبر مني يدوز و اذا شفت مرا كبيرة في الحمام او الطوبيس او اي بلاصة نعطيها بلاصتي ، هادي هي الانسانية وهي العفة وهادي هي الاخلاق ماشي الفولارات و الدفيع ماذا تفيد تغطية الرأس الفارغ .
وتعلمت هنا في اسبانيا اي مكان الدخول بالصف او بالرقم ماكينش غوفل عليا نغوفل عليك ، اللي ماكيترباش في دارهم او في المدرسة كتربيه الدولة بالقانون السائد على الجميع، و اللي كيخترق القانون ويبغي يغوفل كايديوه البوليس يتربى . كنتمنى بلادي توصل لهاد المستوى و كنتمنى المسؤولين يهتموا اكثر بتأطير العاملين في مجال التعليم لان معظم مشاكلنا جاية من قلة التربية سواء من الأهل او المدرسة او القانون .
ومثال على ان التربية هي الحل شاهدو شعب الصين العظيم واعدادهم الغفيرة و ماكينش الفوضى شوفو شعب اليابان و تذكروا كلامي .
رسائلي للكبار فهما لا الكبار سنا
الله يجيب اللي يفهمنا ولا يعطيناش