موقف الاتحاديين "الضبابي" دوخ بنكيران وقلق الاستقلاليين: ها كيفاش كلشي يقدر يضيعو لشكر

موقف حزب الاتحاد الاشتراكي للقوات الشعبية من المشاركة في الحكومة من عدمها دوخ عبد الاله بنكيران. وفق مصادر ل"كود" فان بيان امس للحزب زاد خلاه ما يفهمش. الحزب باغي يشارك وما باغيش يشارك. يعني باغي يفاوض من موقع قوة واخا ما عندوش عدد النواب البرلمانيين اللي يسمح ليه يكون قوي ولكن بلا ما يقبل رسميا المشاركة في الحكومة.
هاد اللعب دوخ كلشي. حتى بعض القادة الاستقلاليين بداو يتقلقو من هاد الموقف. الحزب دار مجهود كبير بزاف بزاف من خلال امينه العام حميد شباط باش يدخل الاتحاد الحكومة ولكن مازال تالف. على الاقل الاحزاب الاخرى يشرح مصدر "كود" دارت تاريخ "الحركة الشعبية كالت عنها مجلس وطني نهار 29 اي السبت ونفس اليوم كاين مؤتمر التجمع الوطني للاحرار ولكن الاتحاد كاين غير البيانات بلا افق بلا تاريخ للحسم بلا لجنة ادارية او مكتب سياسي للحسم بصفة نهائية غير المناورات" يشرح مصدر "كود".
واش لشكر كيناور ولا كيتسنى التعليمات من حزبو او من خارج حزبو. اليوم ايلى فاوض غادي يكون من موقع قوة وغدا ايلى دخل التجمع الوطني للاحرار غادي يكون من موقف ضعف وصورتو غادية تزاد تخسر اكثر مما هي خاسرة اليوم.