ها المعقول: واش الدكتور لهنا عندو الحق يحتج. الوردي ل"كود": آ السي لهنا طبق القانون وحصل على التراخيص واجي نساعدك وطبقو كيفما طبقتيه ففرنسا

واش بصاح وزارة الصحة فشخص وزيرها الحسين الوردي وقفات مركز صحي اجتماعي اسمه "انجاب" للدكتور زهير لهنا دارو فكازا للاجئين والفقرا؟ هاد الشي اللي تكتب وتكال، غير اجيبو نسمعو موقف وزارة الصحة بعا. وزير الصحة الحسين الوردي عندو رأي اخر. السيد كيكول باللي مع اي طبيب باغي يداوي لمغاربة فابور ويساعد الفقرا خاصة وهو مستعد، يقول في حواره مع "كود" لدعم كل المبادرات. طبعا عندو شرط صغيور وصافي وهو "كلشي يدار فاطار القانون".
نرجعو لحالة الدكتور لهنا. حسب وزير الصحة ل"كود" فان لهنا لوقيتة اللي غادر المغرب في اتجاه فرنسا خدا معاه وثيقة تبين انه ما بقاش فهيئة اطباء المغرب باش يسجل فهيئة اطباء فرنسا وانه كا حريص على تطبيق القانون تماك. المغرب حتى هو عندو قانون 131/13 اللي ما يسمحش لاي طبيب يزاول المهنة بلا ما يكون فهيئة الاطباء. حسب الوزير ل"كود" فان الدكتور لهنا تقدم بطلب بالفعل بالعضوية في هيئة الاطباء ولكن مازال ما حصلش على الوثيقة. حقاش ممنوع قانونا التسجيل في هيئتين. طلبه حسب الوزير ل"كود" "عيادة لامراض النساء والتوليد" لم يتم الرد عليه، ومع ذلك سبق كلشي وفتح مركز صحي واجتماعي.
وهادا هو المشكل الثاني حسب الوزير الوردي ل"كود"، لانه ما عندوش الحق يفتح عيادة بدون التسجيل في هيئة الاطباء وممنوع تتقدم بعيادة وترجعها مركز صحي بحجة علاج الفقراء لان الدولة في شخص الوزارة خاصها تعرف شكون خدام ودير خبرتها وتشوف معايير السلامة يعني كاينة اجراءات خاصها دار. وعليه فحالته اليوم يضيف الوزير ل"كود" "فتح مركز /انجاب/ بدون ترخيص وكيخدم الناس بدون ترخيص وكيعالج الناس بدون التوفر على الشروط. الوزير اضاف بسخرية في تصريحه ل"كود" "السي لهنا هاد الشي واش ممكن ديرو ففرنسا. علاش كنتي حريص على تطبيق القانون هناك وما باغيش طبقو فبلادك".
الوزير رد عليه بخصوص اللجنة التي بعثت اليه، وقال "هادي وزارة الصحة ماشي وزارة الصحة العمومية، يعني تهتم بقطاع الصحة في المغرب عامه وخاصه، والوزارة عندها لجان ترسل الى الاطباء بمعرفة مسبقة وكاينين لجان ما يمكنش يديرو خدمتهم الا ايلى دارو زيارات مفاجئة. وعليه قامت لجنة من الوزارة لمعرفة ماذا يحدث في ذلك المركز".
الوزير اثار نقطة اخرى في حواره مع "كود" وهي الاشهار، وقال ان الدكتور لهنا يعرف جيدا ان الاشهار في الطب ممنوع ومع ذلك قام به رغم انه لم يحصل على الموافقة في طلبه للانضمام الى هيئة الاطباء.
الوزير وجه نداء الى الدكتور لهنا عبر "كود" "ايلى بغيتي تساعد الفقرا واللاجئين راه الحكومة كلها والوزارة غادية تساعدك ودعمك وتفتح ليك المستشفيات وتقدم ليك كل انواع المساعدة غير احتارم القانون. هاد لبلاد اللي عزيزة عليك خاصك تحتارم فيها القانون".
كما اثار نقطة اخرى تتعلق بشكايات بعض الاطباء يتهمونه بالمنافسة غير الشريفة عبر تخفيض اثمنة "لفيزيت". ثمن لافيزيت محددها القانون وما ممسوحش كل طبيب يدير الثمن اللي بغى