ها الفتنة ديال بصاح اللي كتهدد المغرب: تزوير الارادة الشعبية. دابا كون مشيتو فبلان تحيدو البي جي دي ويكون التزوير كبير بزاف فين غادين نكونو اليوم يا لفهايمية اللي عينهم يحرقو كلشي فالمغرب

كثرات الهدرة بزاف هاد الايام على الفتنة. حتى هاداك السديسي من السعودية باغي يعطينا الدروس. ديها فراسك وديها فبلادك للي كتحتاقر الادميين قبل ما تعطي الدروس للمغاربة. الفتنة ماشي للي دايرينها هادوك اللي تكلم عليهم بغباء وزير الداخلية محمد حصاد وقال بنوع من التهديد راكم معروفين. الفتنة هي هاد التصريحات ديال حصاد.
لمغاربة من حقهم يحتجو. من حقهم يعبرو على غضبهم من حادث يستحيل يتمحمى من ذاكرتهم ديال مواطن مطحون فكاميو الزبل كيدافع على سلعتو. الشعوب فهاد الحالات كتغضب كتهرس كتحرق كتشعل العافية بصاح. شوفو اش وقع فباريس نهار كان ساركوزي وزير داخلية وسب سكان الضواحي. ناضت ديال بصاح. حتى واحد ما كال فتنة. جاو الباحثين فعلم الاجتماع والسياسيين وسكان الضواحي كيفسرو كيشرحو كيوضحو.
اش من فتنة هادي اللي وقعات فالمغرب؟ راه لمغاربة ولاد الناس احتجو احتجاجا سلميا على حادث مقود بزاف بزاف.
هاد دعاة تسويق الفتنة نساو الضغط لكبير اللي تمارس قبل وايام الانتخابات. نساو شكون دارو. الداخلية لمقدمين الشيوخ. الباطرونا. تعاضدية الموظفين العموميين. النقابات القنوات/…….. كلهم تعبئوا باش يجي البام هو الاول ويسقطو العدالة والتنمية فسابع اكتوبر. اللي وقع راكم عارفين بكل هادوك لمقدمين اللي كانو كيدفعو المواطنين لعدم التصويت على البي جي دي وبكل هاد الجيش جات البي جي دي الاول وتعين رئيس حكومة منها اللي هو امينها العام.
الفتنة هي هاديك المسيرة العجيبة الغريبة اللي حصاد ما عارفش ماليها ودابا كيكول لينا راه عارف اللي خرجو فقضية عادلة.
دابا كون خسرتو البي جي دي بزز ونديرو ان هاد الحزب تفاديا للمشاكل قبل على مضض بالنتائج. اش غادي يكون وضع المغرب فقضية "مول الحوت". ديك الساعة غادية تشعل بصاح.
الفتنة هي كل محاولات تقويض هاد الديموقراطية الصغيورة اللي بادينها. هي ضرب ارادة المواطنين واحتقارها هي الانتقام من المواطنين اللي صوتو على البي جي دي والامثلة كثيرة. هي هاد التخربيق اللي كاين فتشكيل الحكومة.
هادي هي الفتنة الكبرى اللي غادية تحرق كلشي ايلى بقاو هادوك الاشخاص يلعبو بالمغرب بمسقبله