عروبي في بلاج الهاي كلاس

بان ليا واحد البلاج هادي وفيه الطموبيلات زوينة وكتشعل، دخلت الباركينغ ولقيت شي بليصة بين جوج ديال «الباساطات»، براكيت مزيااااااان ودخلت الداسيا وبدو الباساطات كيغوتوا..
جاء عندي العساس وقال ليا: واش غادي تبقى بزااااف، جاني بحال راه حقرني حيت بانت ليه «الداسيا» بحال شي كرويلة مع هاد الطموبيلات ديال المرفحين، وماشي بعيد يكون دورها في راسو: آش جاب هاد المزغوب لهاد البلاصة، خرجت لي شلاغمي وقلت ليه: آش بان ليك؟
قال ليا: غير سولت آآلاستاذ… بصحة والراحة..
قلت مع نفسي: ياك ما عاق بيا هاد ولد الحرام من فعايلو راني ما دوزتش لا فيزيت تكنيك..
ضربت دورة في الباركينغ وانا يبان ليا الطموبيلات كلها كتشعل وفيها البلاكات ديال الخارج، شي واحدين جوا من بعدي الطموبيل ديالهم بحال الشكلات نوتيلا وملي سدوا البيبات دارت: تيت تيت والزجاج بوحدو طلع وسدت ورمشت السنيال ديالها بحال انجلينا جولي ملي كتكون كتمثل في شي فيلم ديال الحب، وانا ملي سديت «الداسيا» دارت: كرك كرك كرك بحال ملي كيخووو السيما والكياس في شي باطما جديدة كتتبني.
ميكت ومشيت نشوف آش واقع في البلاج…
لقيت ناس زوينين وعيالات بحال الحوريات وكيديرو شي كريمات ديال لوريال وشي ماركات ما عمري سمعت بيها… وشي واحدين مبحوطين على كروشهم في شي كراسة بحال الناموسيات ديال الاوتيلات خمسة نجوم… ناس كتشوف حتى الدم ديالهم جاري في العروق ماشي بحالي كارم بحال الجلد ديال الحولي ملي يدبغوه.. وانا نقول آش جابك لهاد البلاصة با طارق..
درت ميكة ومشيت جبت الكرسي ديال 99 درهم اللي شريت من مرجان اللي كان تيسحابليا راه همزة غادي تخليني نولي هاي كلاس..
وخرجت القرعة ديال الماء ديال سلطان عامرة بزيت العود والخل اللي نعتها لي الحسين الشلح: دير زيت العود مع الخل با طارق ملي تمشي البلاج وهاداك الشي ديال الرطوبة دقا ببطلا..
وحتى انا تمسحت ولبست الشورط ودرت النضيضرات الكحلة وجلست تنتبرونزا مع الزماگرية،وخا انا مبرونزي خلوق، قلت ما فيها باس نزين «الوين» باش يولي شوكلاتي زعما..
ملي بدات كتعطيني الشمس سخن عليا جلدي ومع هاداك الشي ديال زيت العود والخل بديت تنحس راني بحال كوكوت ديال الجلبانة بالبقري.. هادوك الناس الهاي ريحتهم عاطية بهادوك الكريمات ديال لوريال، وأنا گالس وليت بحال الراس المبخر… آش من رطوبة با الحسين.. راني كون زدت «راس الحانوت» كون وليت مروزية..
آش داك با طارق لي شي بلاجات.. گلس وكون في شي ركنة ولا گاع خرج لي غابة الدندون..