انفراد. رئيس الجامعة فوزي لقجع ل"كود": ها سر الروح العالية للاعبي المنتخب وها كيفاش تحمسو بشكل كبير فماتش البارح وها علاش بكاو كاع اللعابة قبل الماتش

قال رئيس الجامعة الملكية لكرة القدم فوزي لقجع ل"كود" ان سر ما يقدمه المنتخب المغربي لكرة القدم من اداء رائع في كأس افريقيا للامم المقامة بالغابون يعود بالاساس الى الانضباط والعمل والروح العالية للاعبين والطاقم الفني والتقني والاداري.
لقجع كشف ل"كود" عن القتالية الكبيرة التي ظهر بها المنتخب المغربي يوم امس الثلاثاء في مباراته ضد الكوت ديفوار "قبل ما يبدا الماتش وبعد ما كمل المدرب خدمتو عرضنا على اللعابة فيديو مدته 10 دقايق فيه عائلاتهم كيتكلمو معاهم ويرفعو من معنوياتهم". لقجع اكد ل"كود" ان اباء وافراد عائلات اللاعبين كلهم كيكولو ليهم باللي راضيين عليهم ولكن كيطلبو منهم يشرفو المغرب ويشرفو الراية المغربية. هاد الفيديو وفق رئيس الجامعة ل"كود" خلى كاع اللعابة يتاثرو بزاف. بكاو من هاد التحفيز.
حسب مصدر "كود" فان هاد الفيديو تطلب اعداده 4 ايام ودار ليه مونتاج وتوجد خصيصا لهاد المناسبة =قبل مباراة الكوت ديفوار". هاد الفيديو خلى اللعابة يشعرو بالمسؤولية.
لقجع كشف ل"كود" عن امر اساسي تمر فيه اجواء المنتخب المغربي٬ وقال ل"كود" "اللعابة شهر وهما بعاد على عائلاتهم على ديورهم. ولكن حافظو على الروح الجماعية. ما نعيشه في المنتخب اجواء رائعة. الجميع من يرافق المنتخب من لاعبين وتقنيين واداريين يتكلمون لغة واحدة. الجميع يحدوه هدف واحد نفرحو لمغاربة. نرفعو راسهم. الاجواء مثالية فكلشي".
لقجع اكد ل"كود" انه منذ سنة ونصف "ممنوع يقرب شي حد للمنتخب الوطني. سواء جامعيون او رسميون. اللعابة فاوطيل بعيد وكنسمح حتى لحد يوصل ليهم"٬ كما كشف ان من اسباب ما نعيشه "كل واحد كيدير خدمتو داخل المنتخب. كل واحد مهامو معروفة. كل واحد كيدير خدمتو".
واكد رئيس الجامعة ل"كود" انه ماشي غير الشيما تاكتيك اللي كتنجح بل الروح المعنوية اللي حققات قفزة نوعية. فذهن اللعابة هنا ماشي باش نلعبو الكورة. هنا باش نمثلو البلاد. انا فوق ظهري 35 مليون مغربي وقلت للعابة راها فوق ظهر كل واحد منهم هاد 35 مليون مغربي" واضاف لقجع ل"كود" ان لاعبي الاسود اطلعوا بعد الفوز على الطوغو على صور الفرحة بالمغرب
لقجع تحدث عن المستقبل وقال ل"كود" ان الانتصار على الكوت ديفوار سيكون له اثره على اقصائيات كأس العالم =الكوت ديفوار مع المغرب فنفس المجموعة= "مادام ربحناهم بعد 24 سنة ما درناها راه ممكن نربحوهم ونتاهلو لكاس العالم". كما كشف ان هاد الروح العالية جدا سيكون لها اثرها على مستقبل المنتخب لوجود لاعبين مازال صحاب بحال فجر ومنديل والفارسي =ما بين 19 و20 سنة=