واش المغاربة ديال الخارج مازالين مغاربة ولا تبدلو؟

—
واش المغاربة ديال برا مازالين مغاربة ولا تبدلو؟
هد الموضوع فيه بزاف مايتقال والدخول فيه غادي يخربق بزاف ديال العلماء والفاهمين فشؤون الهجرة.
بعدا نتفاهمو في البداية غير على هد المصطلح ديال الهجرة والمهاجرين.
بالنسبة ليا، المهاجر هو الوالد ديالي الله يرحمو اللي طلع لبلجيكا فعام 1963, وكان لابس واحد المانطو طويل وواسع وهاز واحد الشانطة قديمة عامرا بالسراول سخان وبجوج ديال القنادر وواحد الجلابا ديال الصوف.
مللي جيت لبلجيكا بالباكالوريا فالجيب عام 1971 باش نكمل قرايتي كانت عندي 20 سنة وماكنتش كنعتبر نفسي مهاجر فحال الوالد والالاف ديال المغاربة اللي سامحو فدواورهوم وجاو يخدمو فالمينا.
بنتي وولدي اللي تزادو فبلجيكا ماعمرهوم كانو مهاجرين أو مغاربة مقيمين بالخارج. بل بالعكس هوما بلاجكا من اصول مغربية.
هادي من جهة، ومن جهة ثانيا، الاولاد ديال الجيل الثالث والرابع اللي كيقضيو العطل ديالهوم فتركيا وايطاليا واسبانيا والبرتغال، ماعمرهوم كانو مهاجرين أو هجرة او ايميغو MRE.
يعني ماعمرهم جاو من شي دوار لابسين مانطو طويل وواسع.
هما كايخدمو هنا وكيخلصو الضرائب هنا وكيصوتو في الانتخابات ديال هنا، وكيمشيو للمحاكم د يال هنا ومنخرطين فالنقابات ديال هنا، وكايديرو الفيتنيس ولا السكواتش هنا، وكايسوكو الطوبيسات ديال هنا، وكايمشيو للسينيمات ديال هنا.
…و مزال كايجي واحد الوزير ديال "الجالية'" كايقوليهوم انتما مهاجرين ولا ايميغو.
كونو تحشمو شي شويا وعارفو شكاتخارجو على فمكوم
فعلا كاين فأوروبا واحد الفئة ديال الخوت اللي غالبا طلعو لهنا حاركين للمرة الثالتة بعد ماجبدوهوم السباليون فازكين من الما وسلموهوم للسلطات المغربية اللي دارت ليهوم محضر عند وكيل الملك.ديال طنجة ولا الناضور
هد الخوت جاو لاروبا فهد العشر سنين الأخرا ومنهوم اللي تزوجو ببناتنا قبل مايفرضو عليهم حمل النقاب بمجرد مادارو الاوراق ديال الاقامة.
هادو هما اللي مصدعين لينا ريوسنا بالغربة، والهجرة والمهجر .
هادو دخلو صحاح حيت حسبو المغاربة القدام ديال الخارج وولادهوم كوانب، وبما أن هاد الفئة ديال القادمين والواردين الجدد، قراو شي شويا ديال البخاري والضمياطي وشي بركا ديال السيد قطب, قالو صافي غاديين نغمقو على الاجيال الأولى والثانية والثالتة اللي مامسوقا لا لبنكيران ولا لشباط.
وبداو كايفتيو ويأولو ويخربقو حتى رونو المخاخ ديال عدد ديال الشباب ورادوهوم وهابيين وداعشيين ومحزمين بالعبوات الناسفة …..
الهوية ديال البلجيكيين من اصول مغربية هي بلجيكية من جهة المواطنة والتفكير الديمقراطي وفنفس الوقت هد الهوية كتبقى عندها ارتباط عاطفي وشيئا ما ثقافي ونوستالجيكي مع المغرب.
فهي على العكس ماكايظنوه المسؤولين المغاربة اللي ماكيمهوم غير الاورو والدخول ديال العملات الصعبة هي فقط هوية مزدوجة.