سيدنا جابها فالتسعين فزلزال الخليج. حتى الان لاعب مزيان نمشيو لافريقيا ونبقاو محايدين واخا القطريين خرجو العيب فالسابق

الملك محمد السادس بما انه هو اللي شاد العلاقات الخارجية للمغرب لاعب لحد الان مزيان فزالزال الخليج. هاد المسافة مزيانة بزاف. ما تورطتش بحال موريتانيا وووو اللي قطعو علاقتهم بقطر ومشاو مع الموقف السعودي الاماراتي البحريني وما داروش بحال الاردن اللي نقصات من البعثة الديبلوماسية ديالها ولا شي دول اخرى اللي استدعات سفيرها للتشاور
النهار الاول باش علنات الدول الخليجية الثلاث ومعاهم مصر قطع العلاقات مع قطر ومشاو بعيد فهاد النقطة بزافت المتتبعين كانوا كيتسناو المغرب يتبع الحلفاء الاستراتيجيين السعودية والامارات والبحرين. علاقة المغرب بيهم كبيرة بزاف وعلاقة حكامهم بالملك وطيدة للغاية. ولكن الرباط خدات مسافة وما تخداتش حتى قرار. اول بيان للخطوط الملكية المغربية اللي عندها شراكة مع "القطرية" كان اخبار المسافرين للي كيمشيو فيها للدوحة ويدوزو للسعودية او البحرين او الامارات ان الرحلات الى قطر مازال كاينة ولكن حدها الدوحة. هاد البيان اللي كيبان تجاري هو قرار سياسي. كيعني ان الرحلات لدول الخليج غادية تبقى ولكل الدول بما فيها الدوحة والتعاون مع القطرية مازال مستمر حقاش اللي بغى يمشي لدول اخرى جنوب شرق اسيا مرحبا بيه.
ديبلوماسيا محمد السادس تكلم مع عبد الله ديال الاردن فالموضوع. اي المغرب لحد الان لاعب مزيان. هاد اللعب خاصو يديرو فالداخل ويهنينا من هاد القضية ديال الريف عبر اطلاق سراح المعتقلين وتلبية مطالب الحراك اللي باغيين صبيطار وطريق وجامعة ويتمتعو ببحرهم وحوتهم.
المغرب فسياستو الخارجية لاعب فافريقيا. انضمامو ل"سيدياو" خطوة جديدة فهاد التوجه اللي بدا هادي سنوات. عندنا ما نربحو فالقارة الافريقية وقليل ما نخسرو وهاد الشي حسن لينا من عريبان