— تعاويد باللغة المغربية كاتعني حكي ولا ّ عاود لييا لَحديث من جديد، باللغة العربية: "دردشة"، غادي يسمح لييّا الأديب، الشاعر، الروائي أو المبدع دريس أمغار المسناوي إيلا ستعرت كلمة "تعاويد" اللي وردات فى وحدة من رواياتو الشيقة اللي كولها حب، حنان، فرحة، تهنئة الوجدان، نشوة الحياة، عفة اللسان، رحمة، كولّها عسل سوسان، رتباط بالأرض، بالثقافة الحقيقية، أكيد أن أوزير الثقافة والإتصال ما عمّرو ما سمع بهاد السميية ولا ّ عندو ولا كتاب ديال هاد المبدع صاحب الموهبة الروائية أو الشعرية الفياضة اللي ما عمّرو بخل علينا بإنتاجاتو الغزيرة، أو من جيبو الخاص، أكيد أن هاد أوزير الثقافة اللي هبط علينا من السما بحال "المهدي المنتظر" ما عندو حتى رتباط بالثقافة، واش الطبيب غادي يعرف يبني قنطرة، المهنديز يضرب حتى الشّوكة؟ واش الميكانيسيان غادي يعرف خدمة الكبّاص، الكبّاص للطّوموبيلات؟ ما عادا إيلا بغاوْا هادو يتعلّموا في شي حدّ الصنعة حتى إرجعوا كايطيروا فيها من بعد 20 سنين. واش اللي طييّحوا سنانهم فى ميدان الثقافة بحال اللي مطّفل عليها؟ أكيد أن هاد لوزير الجديد ما عمّرو سمع شي سميية ولا ّ قرى حتى شي مؤلف ألْهاد الكتاب المغاربة، غادي إعذروني بعض الإخوة، الأخوات إيلا نسيت شي واحد ولا ّ وحدة منهم: محمد برادة، ياسين عدنان، أحمد بوزفور، ماحي بينبين، حسن بورقية، محمد شكري، دريس شرايبي، زاكية داوود، يوسف أمين علمي، قدور علمي، إيدمون عمران المالح، علال الفاسي، عبد الكريم غلاب، سليم جاي، عبد الرفيع الجواهري، محمد خير الدين، دريس الخوري، أحمد المسيح، عبدالكبير الخطيبي، عبدالكريم الجويطي، طاهر بن جلون، عبداللطيف اللعبي، محمد عزيز الحبابي، فؤاد العروي، أحمد الصفريوي، محمد السرغني، عبدالحق سرحان، ليلى السليماني، موحى السواك، عبدالله الطيع، بثينة الطويل، محمد زفزاف، عبدالله زريقة، محمد زنيبر ألخ، بعض المصريين: توفيق الحكيم، سلامة صلاح، طه حسين، عباس محمود العقاد، سلامة موسى، مصطفى لطفي المنفلوطي، نوال سعداوي، نجيب محفوظ، نبيل فاروق إلخ، بلا ما نذكروا الدول لوخرة من قبيل الجزائر، تونس، السودان، العراق، سوريا، لبنان، دول الخليج اللي كاتوفّر حتى هي على كم كبير من الكتاب، المفكرين، الفنانين إلخ، ما حساك عاد كتاب العالم المرموقين اللي الكثير منهم نال جائزة نوبل بحال: سالي برودوم، تيودور مومزن، داريو فو، هانريس بول، كونتار كراس، كاوو سنيندجيان، ألفريدا يليناك، أورحان باموك، دوريس ليسينج، هيرطا مولير، ماريو فاركاس ليوسا، مو يان، عدد لا يحصى من الكتاب، الفنانين، الرسامين إلخ من السمييات اللي ما يمكنش لييّا نذكرهم حتى هوما فى هاد الإطار، كايتّحاصوْا بالمياوات، الألوفات. الثقافة مهنة ديال أمّاليها، ماشي ديال صحاب الهموز، الصّنطيحة أو الهضرة الخاوية بلا حتى شي كتاب، ولا مقال واحد خاص بهاد القطاع، ما عجبني غير داك الديكور السّوريالي بعد أمّا كتاشفوا بعض علماء الآثار المغاربة بمعية إخصائيين ألمان فك، جمجمة ديال الإنسان العاقل اللي عندو 315 ألف عام ولو كانعرفوا لحد الآن أن الرقم الوارد يلا ّه 200 ألف عام، لوزير ديال الثقافة ما عارفش قيمة هاد الإكتشاف الفريد من نوعو على الصعيد الدولي، كاعد بحال شي مشموم ديال الورد، أو شنو هو ذنبو إيلا ماشي ذنب اللي دافعو؟ أكيد أنه سمع لأول مرة بالإنسان العاقل، أمّا فى المغرب ما عندنا غير اللي ما عندو عقل، ما كاين غير كوّر أو عطي ألّعور. أمّا فى ما يخص رفع دعوة باش تجني 100 مليون سانتيم اللي كان خاص ّ جوج ديال الصحافيين إدفعوها كغرامة مالية إيلا زكّات المحكمة دفوعات المدعي، من المحتمل أن هاد الراجل يربح القضية فى المحكمة، لأنه كانعرفوا كيفاش داير القضاء ديالنا، بلا ما ندخول فى التفاصيل، كاينين إخوان من ترانسبارانسي عندهم ملفات ديال الفساد أو ما كاين حتى شي واحد بغى يقبطهم من عندهم، اللي فيه الفز كايقفز، هادوا هوما الوطنين اللي كايبغيوْا الخير لجميع المغاربة، المغربيات. 100 مليون سانتيم ما كايطلبهاش راجل سياسي متعقل، حكيم، لا! لأن مصداقيتو غادي أتّعفّن، أو هادا خطء سياسي قاتل، لأن الناس غادي تقول مع راسها هادا ما كايخمّم غير فى الفلوس اللي بغى يربحهم على ظهر ناس بسطاء، أصلا ما عندهمش، بحال إيلا هاد الراجل مخصوص، خصّو غير إخمّم شي شوية أو إقول مع راسو: "واش كرامتي كاتسوى هاد الثمن؟لا! ما عندها ثمن أو ماشي ألّبيع ولا ّ ألّمساومة،" فى الدول المتقدمة الثريين كايتبرّعوا على الجمعيات الصادقة، يبنيوْا جامعات، حتى باسميتهم، كايعطيوْا هبات ألّمدون، ألّخيريات، كايوقفوا برجليهم أو إسربيوْاعلى الضعفاء أو المتشردين، ماشي كايبغيوْا إشّردوا صحافيين اللي الأصل الوحيد اللي عندهم هي مصداقيتهم أو نظافة ريشتهم أو ما مسّخرينها لا لهادا ولا ّ ألا ّخور، إييّه بغينا، "أغراس، أغراس"، ولاكن ماشي نغرسوا فى الناس شوكة الفساد، الإنحراف أو السوء. هادا اللي باغي 100 مليون سانتيم بلا ما يتعب راسو، علاش ألا ّ؟ إيلا شفنا آخيرا البرلمان خاوي ما بغى حدّ إطل ّ على أوجه العثماني أو رباعتو، بتعبير لطيف، حتى هادوا ناعسين فى ديورهم، ما باغيين خدمة، غير الفلوس، كلمة البرلماني كافية، خدّامة عليهم بالوكالة. والله العظيم أو هاد الشهر المبارك إيلا هادي مهزلة، على من كايضحكوا هاد البرلمانيين المعكازين، باستثناء الشرفاء منهم؟ عفّنوا الصورة ديال السياسة حتى مل ّ الشعب من سيفتهم أو من هضرتهم، قولتها المرة اللي دازت أو غادي نعاودها، الأحزاب السياسية فى الديمقراطيات العريقة طرف من المجتمع المدني لأنه عندهم متداد جماهري، الأغلبية الساحقة كانشوفهم غير كاتكون الكاميلة كاتحمّر، ديك الساعة عاد كايضوروا على الديور، بغينا باش أندوّزوا، صوتكم. أمّا أسطورة أن المغرب دولة فقيرة هادي غير خرايف راشية، اللي كايقول بأن المغرب فقير باغي غير إبرّر فقر المغاربة باش يبقاوْا ساكتين أو إقولوا هاد الشي اللي طلّع المغرف، بحال إيلا هاد الشي قدر منزل، لا المغرب عندو خيرات لا تحصى، لا من ثروات طبيعية ولا ّ معدنية، شوفوا غير الفيلات، القصورى، الموبلات اللي مبنيين فى جميع ربوع المملكة، غادي تكتاشفوا بأن المياوات ديال الملاير ديال الدرهم تردمات فى الحجر أو السيما، غير فى كاليفورنيا، عين الدياب كاينين فيلات ما كاينينش حتى فى دول أوربية متقدمة، الأغلبية الساحقة ربحات فلوسها حلال، ولاكن كاينة واحد الفئة كبيرة من المفسدين اللي شراوها غير بالرشوة أو نهب المال العام، أو موشكل المغرب اليوما: الفساد أو التعليم الفاشل. كانموذج للتعليم الناجح الدانمارك، فينلاندا، السويد، كولهم ما عندهم حتى شي ثروة طبيعية ولا ّ معدنية، عندهم العقولة أو كايتعتابروا من أسعد الدول فى العالم، لأن بالتعليم الناجح كايكونوا عندك أطر، طاقات بشرية اللي كاتوفّر فرص الشغل ألجيوش من أولاد الشعب، لأنها كاتفتح شركات على الصعيد المحلي أو العالمي، كاتكوّن الأطبية، المهندسين، اليد العاملة المتخصصة، جميع الأطر، كاتبني دولة ديمقراطية، فاين كايتعلموا الدراري من الصغور أن الثقة أو المصداقية هي كولشي، بحال فى الدانمارك، يعني ما تسرقنيش، ما تكذبش علييّا، بني لييّا سبيرطارات، مدارس كاتشرّف، مرافق عمومية، ملاعب، خاطبني، سمع لييّا، تحاور معايا بطريقة سلمية، لاهراوة، لا قمع، لا قنبولة مسيلة للدموع، لا تطلق علييّا العسكر اللي خصّوا إحارب العدو أو يحمي الحدود ماشي إطيح فى أولاد الشعب بالقرطاس، هاد الشي كاتقوم بيه غير الدول المتخلفة. فى الآونة الأخيرة سمعت، قريت بزاف على الإنفصال، بالأخص فى إطار حتجاجات الريف، ما عمّرني سمعت شي واحد من اللي كانوا كايقودوا هاد الإحتجاجات السلمية أنهم بغاوْا ينفاصلوا على المغرب، بالنسبة لييّا أكبر نفصاليين، هوما اللي نفاصلوا كولييّا على هموم الشعب، مشاكلو، تطلعاتو أو ما مدّيينها غير فى راسهم، أمّا المحتجين هادوا كايبغيوْا الخير، غايورين على جيهتهم، من حقهم، أو من حق ذويهم اللي فى المهجر إساندوهم ماديا أو معنويا، لأن الدولة أو السياسيين المغاربة قالوا ليهم عوموا بحركم، شنو كايقول السي العتيق، عتق آ السي العتيق، أوزير الهجرة، والو! ما دافع على الجالية، ما قال كلمة حق ولا ّ تكلم على تهدئة الأوضاع الإجتماعية اللي كاتقوم بيها على طريق الحوالات الضخمة اللي كاتجني بيها الدولة الملايير من العملة الصعبة بلا حتى شي مقابل ملموس يذكر، حتى اللي كاينوب عليها ماشي من أوسطها، غريب عليها أو على مشاكيلها، ما فاد حدّ السي عتيق، يعني هاد المنصب صوري، هو أصلا ً ما عندو حتى شي علاقة بالهجرة، حيت ما عمّرو خرج من المغرب، عبث فى عبث، بغينا الملكية، نرمّموا بيتنا ولا نخرّبوه كيف خربوه العرب فى الشرق الأوسط، ولاكن المزيد من المرونة أو الحكمة باش نزيدوا القدّام، ولا نعملوا بحال إيلا كانتحركوا، ولاكن باقي ما عملانش حتى الخطوة اللولة، أو فى ما يخص الإعتقالات الأخيرة ضروري يدخّل الملك محمد السادس أو يصدر عفوو على جميع سجناء الرأي، لأنه كانغيورا كولنا على هاد البلاد أو ما بغيناش صورتنا أتلطّخ ولا ّ أتّشوّه، حنا كولّنا مسؤولين، لا شعب، لا ملك، لا مجتمع مدني، لا أحزاب سياسية، نقابات ولا ّ جمعيات.
