كود تنفرد بنشر مذكرات محمد سقراط في السجن الحلقة 44. فسجن أزيلال قتلونا المسؤولين بأن الماكلة ديالهوم زوينة، معرفتش باش كانوا كيقارنوها باش حددوا أنها زينة, واش بالماكلة لي ترباو كياكلوها فديورهم .

يقع سجن أزيلال خارج المدينة غربا جهة القبلة, على جنب الغابة, بوحدو محطوط تما معزول , أصلا أزيلال كلها جات معزولة, وجات خارج التاريخ والجغرافية والأحداث, وحبسها جا خارجها , دخل الكار نزلونا حنا لي فالنص القدامي وبقاو لخريين من بعد عرفنا أنهم مشاو لبني ملال, كانوا معانا شي وحدين عاد خارجين من أزيلال وكاين لي مدوزو كثر من جوج مرات تلاتة , كاين لي كيخرج من أزيلال كيركب لمراكش, غي كيوصل أول حاجة كيديرها كيمشي للبيسري ديال الشراب كيتقدى 1715, كيعطيها للطاسة, كيتلاقى بشي عشران, كيزيدو الشراب, كيدوز شي يوماين أو تلاتة سكران, كيدير المونتيف, كيديوه لبولمهارز, من بعد كيهزوه طرانسفير لأزيلال, وهاكة عاوتاني ملي كيخرج كتعاود نفس القصة , كاين لي عندو غي 25 عام, وكتلقاه مدوز 8 سنين ديال الحبس مقطعة شهورة, ومدوز سبعة دلحباسات وأكثر .

ستفونا مع واحد الحيط , وقف علينا المدير وزبانيته , خطب علينا خطبة الإستقبال : هنا راه ماشي مراكش,هنا مكاين فوضى مكاين وسخ مكاين قمل مكاين مضاربات, هنا راه الإنظباط والنظافة والماكلة زينة, مكاينش داك الوسخ ديال مراكش, ومكاينش الحشيش والمخدرات, وإم بي 3 ممنوع, ولي داير شي غوفالة يحسنها, وكونوا معانا رجال نكونوا معاكم رجال .

عاوتاني رجعنا للقصة ديال كون راجل . كون راجل فالحبس هي كون خاضع وحاني الراس, وكون راجل عند عشراني الحباسة هي كون حسكة ومتقمعش من طرف موالين الوقت ومتخضعش ليهم, وكون راجل عند صاحبتي هي متخونهاش ومتشوفش فشي وحدة غيرها والتزم معاها ومتكرفصش عليها, وكون راجل عند الواليدة هي خدم وتزوج ودير وليدات, ومتشرب متكمي متخسر فلوس, وكون راجل عند الواليد هي شد السلعة والطوموبيل وتكلف نتا بكولشي وخليه يرتاح, حيث هو كبر وعيا, وكون راجل عند الشيخ سار هي متفرجش فالمواقع الإباحية , وكون راجل عند مجيريبة هي قتلوا باش يرتاح من هاد الدنيا, وكون راجل عند سعيد هي حل معاه لكريطينة ....تلفت أنا كولشي باغيني نكون راجل بطريقتو, وأنا باغي نكون راجل غي بطريقتي وهي نعيش مرتاح ومنحسش بالملل حتى نموت.

دخلونا لواحد القاعة , بقينا واقفين فيها شي ساعة, ومنعو علينا نكميو باش منوسخوهاش, فرقوا علينا خبزة للواحد, وجابوا لينا جوج طباسل ديال لعدس كبار طحنا فيهم عميين, وقف علينا نائب المدير: كولوا والى باقي خاصكم نزيدوكم هنا راه الماكلة زينة ...

وطيلة عام وشهر لي دوزت فأزيلال, كانوا ديما كيفكرونا بلي هنا الماكلة زينة, المشكل هو أنها كانت مجرد ماكلة ديال الحبس وكون ماجوع والضرورة راه مناكلوهاش وفالغالب مكناكلوهاش الى ملي كنتحنسرو, معرفتش باش كانوا كيقارنوها باش حددوا أنها زينة, واش بالماكلة لي ترباو كياكلوها فديورهم .

من بعد بداو كيقلبوا فينا , وطبعا كيما جاري بيه العمل , حيد السروال, حيد الكرصون, قرد, كحب , لي تقلب كيخرج لواحد الساحة فين محطوطين الميكات ديالنا وصيكانا , كتقلب على ميكاتك كتعزلهم, كيبداو يقلبوا فيهم وبنفس الطريقة لي تقلبنا بها فمراكش, أرى فرتك كولشي عاوتاني , أنا على خلاف الآخرين كانت عندي السلعة والحوايج قلال, والكتوبة كثار, تجمعوا عليا الموظفين مع حيت نيت كنت كنبان بحال الى غي تالف وجيت لتما عن طريق الغلط , حيدو ليا لكتوبة قاليك راه ممنوع تدخل عندك هادشي كامل , طلبت الموظف على جوج كتوبة وخلاني ندخلهم , مدار السرطان ديال هينري ميلر وعشت لأروي ديال كابرييل كارسيا ماركيز.

مشيت للرومبة وهنا عيتم التوزيع ديالنا على الكارتيات , كاين جوج واحد فيهم لقبوه الحباسة بجنان الكرمة, ومن بعد غادي نعرف علاش سماوه هكاك , فاللول عزلونا على حساب شكون لي معندوش سوابق وعندو قل من عام ديال الحبس, وهادو داوهم لجنان لكرمة , كانوا معانا شي وحدين كنعرفهم شبعانين حباسات حتى هوما قالوا معندهم سوابق, كان كيجبليهم الله راه لي معندو سوابق غادي يديوه للوطيل, ساعة العكس جنان الكرمة كان أقود كارتي فالحبس وفيه القمع , والبراهش كثار.

أنا معنديش سوابق ولكن كانت باقا ليا عام وشهر ديال الحبس , وهاداك الشهر جعل فيه الله الباراكة, وهو السبب حتى مامشيتش لجنان الكرمة , ملي مشينا للكارتي ألف , عاوتاني عزلونا , لي عندو من عام لتحت سيفطوه للوسط, ولي عندو فوق عام سيفطوه للفوق للدوزيام , لي معندوش لكواش بزاف فرقوا عليه البيضانصي , سانترينا روالاتنا لتحت, وطلعت لفوق بالظبط للشامري رقم ربعة , كنسميوه الربعة لفوق لتمييزه عن الربعة لوسط والربعة لتحت .

دخلت حطيت سلعتي فالأرض وسط الشامبر, حطيت كواشي وقردت فوق منهم , بوجادي, جديد, بحال الى ممدوز حتى نهار ديال الحبس, أرى عاود من الزيرو عاوتاني, وعيش معاهم شي شهر, وحفظهم, وصنف بنادم, وعرف معامن تتعامل ومعامن لا, وعزل ولاد لقحاب شكون والرجال شكون, والحماق شكون والزوامل شكون والبياعة ديال موالين الوقت شكون واللواطة شكون, وعزل وفرق وصنف, عاد انطلق ديك الساعة عرفهم براسك شكون .