الياس العماري اما يدخل للتاريخ او يخرج منو مدلول. يستحيل شي ريفي حر يستاقل ويتراجع على استقالتو ولو رفضوها كلشي وها علاش المجلس الوطني غير شكلي

استقالة الياس العماري من منصبه كامين عام لحزب الاصالة والمعاصرة فهاد الوقت ماشي حاجة ساهلة. اللي كيعرف الياس كيعرف باللي هاد القرار خداه وامن بيه وغادي يمشي بيه الى النهاية. اللي كيعرف الياس كيعرف باللي هاد الاستقالة نهائية. طبعا صدمات ناس المكتب السياسي. عادي. حقاش الغالبية العظمى الياسيو الهوى وبسبابو ضمنو بلاصة فهاد المجلس. عبد اللطيف وهبي وفاطمة الزهراء المنصوري ما حضروش هادو موقفهم من الاستقالة عندو معنى. الاول طالب بيها شحال هادي والثانية عندها خلاف معاه وهي الاكثر جرادة بهاد المنصب اليوم.
الياس العماري ابن الريف ويستحيل فهاد الوقت اللي كيشهد هاد الريف حراك زلزل البلاد يجي ولد المنطقة ويدير استقالة صورية. هاد الاستقالة طبعا نتيجة لخطاب الملك فعيد العرش يوم 29 يوليوز الاخير ايلى طلعاش غير سينما الخطاب نفسو غادي يصبح بدون اثر. الملك باغي نخبة سياسية قادة بشغلها قد فمها قد لسانها. البداية تبدا من المواقف. باش تستاقل يعني تستاقل.
الياس العماري الى دارها غادي يدخل للتاريخ. استبق كلشي سواء فهم ان جزءا من الخطاب الملكي عليه او ما فهمتش. المهم عطى الفرصة لشخص اخر ولكن ايلى كان هاد الشي سينما وهاذا مستبعد بزاف بزاف٬ راه غادي يخرج من التاريخ ويصبح ضحكة وهاد الشي يستحيل يقبلو واحد بعزة نفس بحال الياس العماري.
دابا علاش المكتب السياسي رفض هاد الاستقالة؟ كاين قضية ان فيه نسبة من صحابو فهاد المجلس وحسو بالصدمة وغاديين يرفضوها باش ما يبقاوش يتامى، ثم ان انتظار المجلس الوطني حتى نهاية الشهر كتعطي الفرصة لخروج مشرف له. خروج يضمن له الكرامة ويضمن لاتباعه ومورديه وقت باش يختارو اش بغاو