الوداد سلاو المعسكر وراجعين لكازا باش استعداو للفتح

—
أنهى الوداد الرياضي المعسكر ديالو بمدينة الجديدة البارح في ليل، ورجعوا لكازا باش اكملوا التداريب ديالهم، باش العبوا الماتش ديالهم أمام الفتح، لهو ماتش قمة برسم الدورة الأولى من الدوري الاحترافي.
عموتة فضل ارجع اللاعبين باش اكملوا التداريب بمازا، باش اشوفو عائلاتهم ووليداتهم، قبل من الماتش، لأنهم من بعد العيد لكبير مشاو مباشرة للجديدة، باش ادربوا.
وغادي ادرب الوداد الرياضي في مركب كهرماء، لأن تيران ديال الفريق بمركب بنجلون باقي كيتضاوب، وميقدروش استعدوا فيه للماتش، داكشي علاش غادي امشو لكهرماء، واخا العشب ديالو حتى هو ماشي مزيان، ونهار دربوا فيه الرجاء المدرب الاسباني غاريدو معجبوش وطلب ابدل التيران.
التجمع التدريبي ديال الوداد غاب عليه لولاد لمشا لبلجيكا باش اشوف ولدو مريض، ومغاديش لعب الماتش ضد الفتح، وغاب كذلك رشيد حسيني لمبقاش عاجب عموتة وباغي اتفك منو.
الماتش ديال الوداد غادي العبوا بملعب مركب محمد الخامس، قبل ميبدا استعد للماتش ديالو ضد الفريق الجنوب إفريقي صان داونز، لغادي العبوا برسم ربع نهائي عصبة الأبطال الإفريقية.
الماتش ديال الروتور غادي اكون بالمغرب ولكن مازال الوداد معرفوش واش غادي العبوه فكازا ولا امشيو للرباط، لأن دونور اقدر اتسد.