واش خاصنا نكونو مدينين للمعلم للي قرانا؟ ما يمكنش نقدسوهم راه الرسل براسهم ماشي كلهم قدمو الخير للبشرية والناس مازالة كتموت بسبابهم

بزاف كيطلبوا منا نكونوا مدينين للمعلمين لي قراونا غير حيث علمونا نفكو الحرف ، كأنه شي عمل خارق ، حقا الأمر مفيد ولكنه مكانش فالأصل عمل خيري اتجاهنا كتلاميذ بل كانت مهنة مقابل أجر ، البعض مارسها من نيتو وعطى فيها الكثير وكاين لي على حساب حياتو الشخصية ، والبعض كان معتابر الأمر مجرد وسيلة لكسب قوت يومه ، وكون غير كان كيدير داكشي علاش كيتخلص بل العكس ، بالنسبة ليه حيت حشاه فالدولة فهانية دابا قراو التلامذ ولا ماقراوش صاليرو طالع طالع ، وهادي جملة رددوها علينا المعلمين طيلة مشواري الدراسي " القصير" ، وماشي أنا بوحدي لي سمعتها كاع المغاربة ضروري مايكونوا سمعوها ولو غير مرة فحياتهم خصوصا لي قراو فمدارس الدولة .
وكاين لي كان مخدم القسم حلقة لنشر الدعوة ، وفعوض يقري التلامذ كيبقى يعمر ليهم راسهم بالأفكار الظلامية المشرقية ، أو الأفكار الحمراء ، ميقدرش يقري بتجرد بل العكس بالنسبة ليه بديك الطريقة راه كيدير فيهم خير وكيحل عينيهم حسن من كون قراهم المقرر الدراسي ، وطبعا لي كيبقاو فالذاكرة إما هادوك الأساسدة لي بصح كانو كيقريونا من نيتهم أو دوك لي دوزو علينا العذاب ، ولي كان القسم ديالهم بحال معتقل تازمامارت ، وهادي ماشي مبالغة ، حيث كلينا العصى على الظفار ديال صبعانا ، وكانو التحامل جاري بيهم العمل داك الوقت كطريقة للعقاب ، وقليل الأساسدة لي كانو كيعطيونا عقوبات ديال كتب شي جملة مية مرة ، أو حفظ شي نص ، مكانت غير العصى وهادشي بموافقة الأباء ، وطبعا مكانوش كلهم هاكة ، بل كاين آخرين عكس هاد الناس تماما .
التدريس مهنة بحال أي مهنة خرى وفيه أفراد من المجتمع بمختلف تلاوينهم وسلوكاتهم وأخلاقهم ، المزيان والعيان ، لذا لامعنى باش تعطى واحد الهالة من القدسية لهاد المهنة على حساب مهن أخرى ، ويتعتابرو صحابها من كادوا أن يكونوا رسلا ، حيث الرسل براسهم راه ماشي كلهم قدمو الخير للبشرية وباقي كيموتوا الناس يوميا بسبابهم .