العيطة كيبزنزو فيها. آش جاب لمزند اللي مخلطها إدارة وانتاج ف”تيميتار” للعيطة ؟

تا واحد ما فهم شنو جاب ابراهيم لمزند، المدير الفني لمهرجان تيميتار اللي كا يتنظم بأكادير، لأغاني وموسيقى العيطة، اللي هيا فن وموسيقى “عروبية” بامتياز، خاصة أن كلشي كا يعرف باللي لمزند كيهتم بالإنتاج للفنانين الأمازيغيين، ولا علاقة له بالعيطة لا من قريب ولا من بعيد. خدمتو يكون منتج لمجموعات مغربية كتنغني بالامازيغية ويجيبهم الى تيميتار حقاش هو مديرو الفني. طالع واكل نازل واكل
البركاكة اللي حضرو للندوة الصحافية اللي نظمها لمزند فالدار البيضاء للإعلان عن إصدار “أنطولوجيا العيطة”، أكدو ل”كود” أن القضية فيها “كميلة سخونة” و”فلوس صحاح” من أجل إنجاز هاد المشروع بين مؤسسة “هبة” اللي تكلفات بالتسجيل في الاستوديوهات ديالها وجمعية “أطلس أزوان” ديال لمزند، اللي رفض الإفصاح فالندوة على الميزانية ديال المشروع، وقال باللي الجهات اللي دعمات المشروع اختارت أنها تبقى مجهولة وما يعرفها حد؟؟؟؟
الندوة حضرو ليها بزاف ديال الشيخات ولشياخ المعروفين، بحال خديجة مركوم ومصطفى البيضاوي وولد قدور وولاد البوعزاوي خالد وصالح، عطاهم لمزند ثمن رمزي مقابل المشاركة.