ضربك التريسينتي: ايلى ما عجباتكم بشرى الضوو ما تفرجوش فيها وهنيونا

كلشي كا يتكلم وكا يندد ببشرى الضو وبالبرنامج ديالها ضريبة الشهرة… وفنفس الوقت كلشي كا يشوفو وكا يتفرج فيه… بشرى اختارت الستيل ديالها اللي عجباتو تبارك الله واللي ما حملهاش ما يتبعهاش… إضافة إلى ذلك الضيوف ديال البرنامج عارفين راسهم فين غادين ومع من غا يدوزو واللي ما عارفش يسول على بشرى ونوعية الأسئلة ديالها غا يفهم التصور ديال البرنامج… الناس اللي قبلو يدوزو فالبرنامج راهم قبلو يدخلو فاللعبة واللي ما عجبوش الحال كان ممكن ينساحب بكل هدوء…بلا ضجة ولا ضجيج… أما باش نبداو نحجرو على الناس ونديرو عليهم الوصاية ونقولو ليهم ها كيفاش تمارسو الصحافة فهادا كلام ماشي معقول… الساحة تتسع للجميع وهادشي اللي بغات الوقت وصحابها… كما ان الأسئلة اللي كا تطرح بشرى على الضيوف ديالها الأفاضل كا تقال وكا تردد على ألسنة الناس فالزنقة والقهاوي وفيسبوك… ولكن ملي كا تشعل الكاميرا كا يبدا النفاق طبعا…
والمصيبة الكبيرة والكارثة العظمى هو أن بعض "الحمقى" و"المشيرين" قاليك دارو عريضة بغاو يجمعو فيها 500 ألف توقيع باش يمنعو البرنامج ديال بشرى الضو "ضريبة الشهرة"، مع أن هاد البرنامج كا يتعرض على قناة خاصة ما كا تفرضش على المشاهد نفسها وما ما تاخدش ليه فلوسو… على هاد الحساب، غدا غا يديرو عريضة باش يوقفو الصباح أو كود او شو فتي في أو غيرها من الجرائد والمواقع والقنوات لأن الخط ديالها التحريري ما كا يعجبش شي بعضين… وبعدو غا يديرو عريضة من أجل منع شي نوع من الموسيقى والغناء لا يرضي ذوق شي بعضين… وبعد بعدو غا يديرو عريضة باش يقولو لينا ها الأفلام اللي خاصكم تشوفو…
قبل ما تديرو عريضة لمنع برنامج في قناة خاصة… ديرو عريضة على الحموضة اللي كا يقدمها ليكم التلفزيون ديال الدولة من فلوسكم وضرائبكم… ولا ترجلو نتوما كاع ووقعوا عريضة من أجل إطلاق سراح معتقلي الحسيمة وإيجاد حل لهاد الأزمة الخطيرة اللي كا تعيشها البلاد… إيلا كان هيا ضاربها الضو نتوما راه ضاربكم التريسينتي…