المراكشي مرشح “الباطرونا” فحوار بلا زواق مع “كود”: بنصالح مرة معايا مرة مع مزوار واستاشرت قبل ما نتقدم ومنافسي ما عندو علاقة بالمقاولة واخا ضريف ولكن دوز التسيير ماشي الاستثمار

في حواره مع “كود” يكشف حكيم المراكشي اسباب ترشحه لرئاسة الباطرونا. السيد كيقول باللي ما جاش وترشح وباللي استاشر وجس النبض. المرشح يكشف ل”كود” تقلبات رئيسة الباطرونا اللي مرة دعمو مرة تتخلى عليه ويستغرب ترشح صلاح الدين مزوار اللي ما عمرو كان باطرون وكان غير مسير. اي انو ما عارفش عالم المقاولة كولو
“كود”: علاش ترشحتي للباطرونا؟
حكيم المراكشي: حيث هادي سنين وانا مقاول. خد60 عام قررت نسالي خدمتي بدعم المقاولة المغربية. نخصص ليها تجربتي فعالم المقاولة نعطي كلشي وقتي ليها،
“كود”: ماشي غير جيتي وتلاحيتي. شكون اللي دفعك او دعمك او بين ليك الطريق؟
حكيم المراكشي: عدد من المقاولين اللي دفعوني ودعموني لهاد الترشح
“كود”: شكون هاد الناس واش ناس الفوق ولا غير ناس الباطرونا؟
المراكشي: دخلو عدد من الناس باش يشجعوني. فالتالي قبلت نترشح. الناس اللي تاصلو بي من كلشي. طلبو مني نترشح. كنتكلم على المقاولين على اعضاء الباطرونا
“كود”: انا كنتكلم على ناس الفوق ماشي على الباطرونا؟
المراكشي: اللي متأكد منو هو حتى حد صحيح ما جا عندي وطلب مني باش نبعد. كاين تشجيع. كاين اللي شجعني فالاول ومن بعد مشى كيشجع المنافس ديالي. وزايدون هاد الشي كون كان كون تعرفات.
اللي نقول ليك انو فالاول دفعوني نترشح. رجال اعمال عندهم كونيكسيون. كثار منهم شجعوني باش نتقدم حيث انا جاي من الصناعة وحياتي كلها من الصناعة
“كود”: مريم بنصالح رئيسة الباطرونا المنتهية ولايتها واش كانت معاك وشجعاتك؟
المراكشي: هي ما بايناش لحد الان ما وتاضحاش مع من. هي مقاولة. مرة معايا مرة كتشجع مزوار =المنافس ديالو=
“كود”: واش انت المقاول اللي مقاتل فهاد العالم من سنين كتقلب انك داخل فمنافسة مع واحد ما عمرو كان رجل اعمال؟
المراكشي: اللي نقول ليك وهو ان صلاح الدين مزوار ماشي مقاول. كنتمنى تكون المنافسة شريفة وصافي
“كود”: ولكن ما جاوبتينيش على سؤالي؟
المراكشي: انا كنعرف ميداني مزيان اللي ديما فيه منافسة. كنعرفو من سنوات طويلة. دابا كيف قلت ليك عندي 60 عام راكمت تجربة كبيرة
“كود”: واش كيبقى فيك الحال انك باطرون كتنافس مع مسير ؟
المراكشي: معلوم كيبقى في الحال شوية. انا كنبغي بلادي يمثلوها المقاولين. صعيب يمثلهم واحد سير غير شركات. يمكن استثمرت ولكن استثمارو فشركات عبر اسهم. ما جربتش المغامرة ديال الاستثمار ما جربش الخطر ما كيعرفش حقيقة المشاكل اللي كيواجهها رجل الاعمال. باش كتسير ما كتغامرش بفلوسك. حياتي درت مشاريع غامرت. تدخلت فتحديات.
“كود”: ولكن هو كيقول عندو تجربة 20 عام ديال المقاولة؟
المراكشي: تفاجأت باش قال هاد لكلام. اكيد مزوار عندو تجربة كرجل خدم الدولة وهو سامباتيك وعندو كاليتي بزاف وانا مقاول صغير ولكن هو كان غير مسير ماشي مقاول كيعرف خطورة كل عملية استثمارية، هاد الشي عشتو والاتحاد العام لمقاولات المغرب خاصها اللي عاش هاد التجارب يسيرها.
بلادي محتاجة للباطرونا والباطرونا محتاجة للي كيفهم مشاكلها كيفهم المنافسة كيفهم التحديات لكبيرة اللي كتواجهها.
“كود”: علاش ما كتجبدش اللون السياسي لمنافسك اللي هو كان رئيس الاحرار ودابا فمكتبو السياسي؟
المراكشي: المهم انا ماشي سياسي ما عندي انتماء. الحزب للي معاه مزوار عندي مع اعضاؤو علاقات مزيانة وعندي نفس العلاقات مع احزاب اخرى. حقاش الباطرونا خاصها تكون عندها مسافة مع جميع الاحزاب. الوقت اللي كتفاوض كتفاوض بحياد وكتوصل لنتائج تهم المقاولة المغربية وتطورها