مبقاتش الثقة. مغربية شفرات فلوس المحل فين خدامة وبغات تقولب البوليس فالطاليان

بعد يوماين من إدعاء مستخدمة مغربية بأنها تعرضات للسرقة، علنات مصالح الأمن بمدينة “ريجّو إيميليا” أن حادثة السرقة موقعاتش، وكانت غير من وحي الخيال ديال المشتكية، بالتواطئ مع صاحبها الإيطالي، بغرض يسرقو الفلوس ديال مول المحل فين خدامة الي كان طلب منها تحطهم ليه فالبنكة.
وكانت عناصر الأمن ف”ريجو إيميليا” دخلات فحالة استنفار، بعدما تلقات شكاية من شابة مغربية فعمرها 22 عام ، وخدامة فمحل ديال الصبابط ، نهار الأحد الي فات، كتدعي فيها أنها تعرضات لعملية سرقة من طرف “رجل أسود” و صحيح، وخدا ليها 4 آلاف أورو كانت ناوية تحطها فالبنكة بناء على طلب الباطرون.
ووفق ما أعلن عنو رئيس فرقة الشرطة التي تولات التحري فالحادثة، فإنه على إثر التناقضات المختلفة الي جات فتصريحات المشتكية المغربية، وبالرجوع لتسجيلات كاميرات المراقبة، تبين للمحققين أنها ماتعرضاتش للسرقة والفلوس لي قالت أنها مشات ليها من طرف رجل أسود، هي لي هزاتهم وعطاتهم لصحابها لي ساكنة معاه، وبعد مداهمة الدار لقات عناصر الأمن مبلغ 3800 أورو مخبية فوسادة، وعتارفو الشفارة أنهم صرفو مبلغ 200 أورو .