كيحكمونا السلفيين المتطرفين الاغبياء وما فراسناش ولغاو درس عدنان ابراهيم. كيفاش الوزير التوفيق دار ليهم الخاطر وال سعود اللي فرخ هاد الكائنات كيطحن فيهم

هاد لبلاد ما كتفهم فيها والو. فقضية المفكر المعروف عدنان ابراهيم بان باللي وزير الاوقاف والشؤون الاسلامية احمد التوفيق كيحكمو فيه السلفيين المتطرفيين الاغبياء. جبن التوفيق بان باللي وجه دعوة لعدنان ابراهيم يحضر للدروس الحسنية وجا السيد وبقى فالمغرب حتى رجع البارح بلا ما يدير والو. الوزارة خرجات كتكذب علي لمغاربة وكتقول ما عرضناش عليه.
علاش هاد الشي حقاش امثال حسن الكتاني اللي كان معتقل فقانون الارهاب دار عليه حملة ومعاه التيار السلفي. هاد السلفيون اللي خرجو على المغرب وكانوا سباب فالضربات الارهابية اللي عرفتها الدار البيضاء ف16 مايو 2003 ومن بعدها ظل هاد التيار كيوجد البيئة للفكر الاستئصالي المتخلف٬ اليوم كيحكمو. كيفرضو على الدولة شكون تجيب وشكون ما تجيبش فالدروس الرمضانية اللي اسمها الدروس الحسنية اللي كتكون امام الملك
عدنان ابراهيم يعد من المفكرين الكبار حاليا في العالم الاسلامي والاجتهادات ديالو تثير جدلا. كان مبرمج يلقي درس. السيد كان فرحان وباغي يتلاقى مع الجمهور، جا للبلاد وحتى حد ما استافد منو. اش واقع فهاد لبلاد.
واش هادوك المتخلفين اللي وصفوه بالضال والمضل ولاو كيتحكمو شكون يدخل وشكون يحاضر فالبلاد. هادوك اللي دايرين حرب “مقدسة” ديالهم ضد “موازين” وضد حتى الفقهاء المحسوبين علي التيار الاسلامي المتنور ولاو يحددو شكون يهدر وشكون يسكت
عدنان ابراهيم حقاش عندو النفس مشى البارح وكان من المفروض يبقى حتى الاحد المقبل. ومزيان باللي عرفنا ان السلفيين هم اللي كيحكموا في المغرب ؟ و هاد الاسلام الرسمي المعتدل اذا ما كانش باغي يحارب التطرّف و التعصب بأشخاص مثل عدنان ابراهيم ، باش غا يديرها، بالمهرج الفيزازي.
دابا ال سعود اللي دارو تحالف تاريخي مع التيار الوهابي اللي منو خرجات كاع البلاوي ديال الارهاب٬ كيحاربو اليوم فهاد التيار السلفي الارهابي المتخلف وحنا اللي غير دخيل على لبلاد ولينا كنخافو منهم. برافو التوفيق