لعب الدراري وضرب لسياسة الملك فالقارة. كيفاش عدم اتمام صفقة “ساهام” رجعات علاقتنا بجنوب افريقيا لسابق عهدها. تراجعو على دعمنا فالمونديال واستقبلو البوليساريو

اش واقع فعلاقات المغرب مع جنوب افريقيا؟ كاينة امور كثيرة غريبة وكتوضح باللي ممكن نرجعو لما قبل اللقاء الشهير بين الملك محمد السادس والرئيس الجنوب افريقي اللي حيدوه جاكوب زوما.
اللقاء اللي كان فاواخر نونبر 2017 فابيدجان على هامش القمة الاوربية الافريقية وكان مؤشر على بدية جديدة. بدية لانه كان “ودي” و”طبعته الصراحة والتفاهم الجيد” وباللي القائدين اتفقا “على العمل سويا، يدا في يد، من أجل التوجه نحو مستقبل واعد لاسيما وأن المغرب وجنوب إفريقيا يشكلان قطبين هامين للاستقرار السياسي والتنمية الاقتصادية، كل من جهته، بأقصى شمال وأقصى جنوب القارة".
كلشي اعتقد باللي هادي البداية. سفراء بين البلدين وامكانية لخط جوي وتبادل الزيارات. جا الرئيس الجديد وزاد امكانية هاد التعاون حقاش العلاقات بين جنوب افريقيا والمغرب بقات رهينة حقبة زوما اللي عانات منها الرباط.
جا تحول جديد هو يوم ثامن مارس الماضي. اللي متبع هاد العلاقات بان ليه باللي حتى امكانية سحب جنوب افريقيا لاعترافها بالبوليساريو يقدر يكون واخا هاد الدولة من اكبر المدافعين عنها. ممكن يوقع بسباب صفقة القرن اذ اقتنت شركة “سانلام” الجنوب افريقية شركة “ساهام” للتأمين المغربية بمليار دولار. من كبار المساهمين فهاد الشركة الافريقية هو باتريك موتسيبي اللي هو الرابع فهاد الدولة من حيث الثورة هناك عندو علاقة قرابة مع رئيس جنوب افريقيا. هاد الشخص هو خو تسيبو موتسيبي اللي هي مرات الرئيس سيريل رامافوسا.
الصفقة طبعا كلشي اعتاقد انها سالات حتى خرجات خبارات هاد الاسبوع باللي مازال ما تماتش وممكن تلغى كاع. علاش حقاش الحكومة من خلال وزارة المالية مازال ما عطاتش الضوء الاخضر. مصدر ل”كود” قال باللي الامور ادارية وصافي”. لكن هادي صفقة استراتيجية كبيرة٬ صعيب فبلاد كتقول تشجع الاستثمار الخارجي تعطي هاد المبرر. باينة كاينة امور اخرى. المثير ان المالية اللي تابعة لحزب الاحرار ترفض لحد الان منح الضوء الاخضر لصفقة طرفها وزير فنفس الحكومة هو مولاي حفيظ العلمي اللي فنفس الوقت مول “ساهام”. اللي كيعرف المغرب كيعرف اش كيوقع فهاد الشي وشكون كيتحكم فامور بحال هادي.
المهم هاد لخبار للي خرج كيفسر علاش جنوب افريقيا صعدات مع المغرب. الرباط خاسرة فهاد العملية على جميع المستويات. كتعطي صورة بلد متخلف ما فيهش المؤسسات وكيدير الانتقائية فالاستثمار. باغي ينفاتح على افريقيا ايلى كان هو اللي غادي يشري كيف وقع مع “اتصالات المغرب” اللي اقتنت قبل اسابيع غالبية اسهم شركة للاتصالات فبوركينافاسو٬ وكيبين صورة اخرى ايلى كانت شي شركة افريقية كبيرة هي اللي كتقتاني شركة مغربية. صورتو فالسوق العالمية غادية تأثر.
اللي وقف الصفقة كيضرب فالعمق السياسة الافريقية للملك. حقاش لو ان هاد الصفقة ما صالحاش كانت توقف قبل بدء المفاوضات ماشي حتى الاعلان على كلشي.
دابا جنوب افريقيا بدات كتبدل سياستها عاود ثاني. كلشي عارف باللي رئيس جامعة كرة القدم ديال هاد الدولة سبق وعلن على تأييدو للمغرب بخصوص مونديال 2026 وقال باللي غادي يصوت. هادي يومين خرج خبار كيقول باللي مازال ما حدداتش الدولة على من غادية تصوت. اي امكانية التصويت على امريكا ضدا على المغرب ف13 يونيو المقبل بموسكو قائمة. رئيس لجنة ملف المغرب لهاد المونديال هو مولاي حفيظ العلمي مول الشركة اللي تباعت مع وقف التنفيد =حتى اليوم= للشركة الجنوب افريقية. هاد الشي غادي يزيد يدوخ ناس هاد الدولة القوية
قبل هاد الشي باسبوع سلم وزير خارجية جبهة البوليساريو محمد سالم ولد السالك بالرئيس الجنوب إفريقي سيريل رامافوسا وعطاه رسالة من زعيم الجبهة ابراهيم غالي.
جنوب افريقيا كاعية على هاد التأخير فالصفقة. المغرب اللي ما مفهومش علاش تعطل للمصادقة عليها غادي يخلص ثمن غالي. اللي حرثو الملك محمد السادس فافريقيا يدكوه شي اغبياء بهاد التصرفات.
التحالف مع هاد الدولة استراتيجي للمغرب بل اهم حدث يقدر يبدل موازين القوى فهاد القارة ولكن خاصو يتم ويسالي