الوزير ماكايحتجش ! الوزير يا كايسد دلقوشو يا كايستاقل‎

فكرني الاستاذ أگنوش الله يجازيه بيخير بواحد المقولة شهيرة بمناسبة الخرجة الاخيرة للوزير الداودي !
“Un ministre ça ferme ça gueule ou ça démissionne”
” الوزير يا كايسد دلقوشو ! يا كايقدم استقالتو
هاد المقولة كان قالها الوزير الفرنسي فحكومة فرونسوا ميتيران “Jean-Pierre Chevènement” ! كرد فعل فاش شاف بلي الحكومة لي هوا فيها بدلات التوجه ديالها و مابقاتش كاتناسب التوجه لي دخل بيه النهار الأول..
و بقات هاد الهضرة ديالو متورخة ففرانسا ! فينما كاينوض شي وزير يبدا يتزكك على الحكومة لي هوا جزء منها كايقولو ليه آ سمع آ سيموحمد ” الوزير يا كايسد دلقوشو يا كايقدم استقالتو”
و معناها انه فاش كاتكون وزير ! و ماكاتعجبكش شي حاجة فالحكومة ! و لا كاتشوف راسك مامتافقش مع التوجه ديال الناس لي معاك على الطريقة لي كاتسيير بيها البلاد ! ماتنوضش تفرع لينا راسنا بكثرة البلا بلا الخاوي ! ! هز قشك و سير فحالك !
هادشي طبعا كاين ! و كايوقع فالدول لي محسوبة على العالم المتقدم و لي الوزير فيها وزير و نص ! حنا عشنا حتى شفنا وزير خارج فمظاهرة قدام البرلمان ! عشنا و شفنا وزير خارج كايحتج ؟
وا كاتحتج على شكون آ سي الداودي ؟
علامن خارج تحتج ؟
واش خارج تحتج على حكومة نتا جزء منها ؟
و لا خارج تحتج على الناس لي قررو يقاطعو ؟
و ملي نتا كوزير بگاع الصلاحيات لي عندك و السلطات و المعارف و القوانين و الحزب لي واقفين معاك ماقادش تغير شي حاجة كاتشوفها غالطة فالبلاد و خارج تحتج شنو خليتي لينا حنا الشعب ؟
ملي الوزير ولا كايخرج يحتج شنو بقا للمواطن البسيط ؟
كاتغوت الاقتصاد في خطر ! ايه و من بعد ! نوض عتقو
لاكايبان ليك في خطر شنو كادير سربي دغيا! واش غانعتقو انا !؟ راه نتا لي وزير !
راه ماليها تا معني وزير گالس فالحكومة تيتي نيني ! مخلص واكل شارب ! و فنفس الوقت مامتافقش مع الحكومة !؟ هادي هي يخ منو و عيني فيه.
الحاصول انا شخصيا كانشوف بلي هاد الحكومة ولات كاينطابق عليها داك المثل ديال ماحد ليتيما تبكي و ربي يزيدها ! و ماحد هاد الازمة د المقاطعة مطولة و حنا كانشوفو مظاهر العبث السياسي فالبلاد .