عندنا مثقفين ماقادرينش حتى يحللو الخطاب الملكي ب "شجاعة و عقلانية‎"

—
هاد الصباح قريت واحد المقال على الريق ديال الطاهر بنجلون كايهضر فيه على الخطاب الملكي !
و الصراحة غي شفت السمية ديال الطاهر بن جلون و قلت مع راسي الله يا ودي سي طاهر بيننا يا مرحبا يا مرحبا ! آجي نشوف المثقف المغربي شنو الرأي ديالو فالخطاب ! آجي نشوف التحليل ديال الأنتلجينسيا المغربية للخطاب ! راه كوميم ! الطاهر بن جلون و من لا يعرفه مايمكنش يعطي الرأي ديالو فالخطاب و مانقراهش ! حشومة! و كليكيت على المقال و يا ريتني ماكليكيت!
مقال فارغ ! خاوي ! كايصفر ! ماكاين لا تحليل لا بعد لا عمق لا ستة حمص! السيد لخص الخطاب الملكي فثلاتة ديال الأفكار عقيمة ! الملك ديالنا هوا لي كايكتب الخطابات ديالو بلا بلا بلا ! الملك ديالنا كايهضر بطلاقة عكس" الدوق ديال يورك" لي كان تمتام ! السياسيين المغاربة ماكايديروش خدمتهم ! و المواطن المغربي ماخصوش يعطي الرشوة لا بغا الأمور تقاد و السلام عليكم و رحمة الله تعالى و بركاته! سالا المقال.
و الله حتى بقيت مصدومة ! قريت و عاودت قريت جوج مرات ع الله و عسى يكون قال شي حاجة مافهمتهاش ! عالله و عسى نكون زگلت شي تحليل عميق ! واااالو يعميه ! السيد خدا قبسات من الخطاب الملكي و حطهم هاكاك حرفيين بواحد السطحية ماضايراش.
واش فحال هاد السيد مايفقدوكش الأمل فالطبقة المثقفة فالمغرب و الناس لي كايسميو راسهم نخبة ؟!
علاش غاتجي آ خويا تهز الخطاب و تعاودو لينا بالفرانساوية واش حنا ماقاريينش ؟ مكلخين ؟ منغوليين ضحك علينا ؟!
فيناهوا التحليل ؟ فيناهوا التعليق؟ فيناهي القيمة المضافة ديالك نتا كمثقف لهاد الخطاب ؟!
والو ماكايناش حتى شي قيمة مضافة!
واش المغرب ولا عقيم تال هاد الدرجة يولد لينا غا فحال هاد النوعية ديال المثقفين في حين الجارة الجزائر عندها غا الطيوطة فالنقاشات و التحليل ! ها محمد اركون ! ها كمال داود ! ها بوعالم صنصال ! رشيد بوجدرة ! Les intellectuels ديال بصح لي كايناقشو و يهضرو و نستافدو منهم و معاهم! أنا بعدا شخصيا فاش كانقرا لمحمد اركون مثلا كايخصني نقرا و نعاود و نقرا و نعاود و نوقف باش نفهم مزيان شنو بغا يقول! و فاش كانقرا لكمال داود كانلقا عيني تحلو على شي حوايج ماكانوش كايبانو ليا ! هنا فين كايبان الدور ديال المثقف لي كايفيد راسو و بلادو.
ماشي واحد جاي كايعاود ليا القصة ديال الدوق ديال يورك لي كان كايتمتم فاش كايبغي يخطب على الشعب ديالو !باش فدتيني أنا كمواطنة مغربية بهاد القصة ؟
و لا باش يقوليا بلي السياسيين الشفارة هوما السبب فالعزوف ديال المواطنين عن المشاركة فالانتخابات !
و لا باش يقوليا ماتعطيش الرشوة لابغيتي الحياة تصلح !
هاد الهضرة راحنا عارفينها و لا دخلنا لأي قهوة ديال التيرسي غانتلاقاو بزاف ديال الناس كايگولوها بلا ماتكون سميتهم لا طاهر لا بنجلون و عارفين خصوصا بلي الأمور ماشي بهاد السطحية!
واش مانستاحقوش حنا كمغاربة يكونو عندنا مثقفين قادرين يمارسو التحليل السياسي بعمق بعيدا عن السطحية و الرغبة باش يبانو ملكيين أكثر من الملك و يعطيونا قيمة مضافة حقيقية يذكرها ليهم التاريخ؟