الرميد مؤخرا فواحد الفيديو وقفو صحفي كايسولو على شي تصريح دارو لجريدة الصباح على المثلية الجنسية ! ضار عندو الرميد قاليه بامتعاض" وااا بزاااف المثلية الجنسية عاد ليها الشان نتكلمو عليها" " حنا راه مغاربة هاد الموضوع لادوينا عليه غانعطوه الشان" و كملها و جملها فاش وصف المثليين بالاوساخ" ! هاد الهضرة كاتخرج من فم وزير حقوق الانسان ف 2017 فدولة كاتسمي راسها دولة الحق و القانون، و دايرة وزارة سميتها "وزارة حقوق الانسان"! هاد الهضرة كايقولها وزير حقوق الانسان فبلاد لي المثليين فيها كايتعرضو للعنف من طرف الأسر و المجتمع و لي السيد الوزير نورمالمو و عبر منصبه خاصو يحميهم على اعتبار انهم حتى هوما واقيلة وااااقيلة و لاماخفت نكذب "انسان"! أنا سؤال واحد لي عندي ! واش هاد السيد نهار عطاوه وزارة حقوق الانسان مافسروش ليه شنو هي كلمة انسان ؟ ماعطاوهش شي قاموس و لا بيشريل باش يشوف التعريف ! ماگالوش ليه بلي حتى المثليين انسان و مواطنين مغاربة تاهوما و لا باش تعطيوهم صفة إنسان و لا مواطن خاصكم تقلبو ليهم تراميهم ؟! راه مصيبة هادي ! مهزلة و الله تا مهزلة وكون وقعات فشي بلاد أخرى كاتحتارم راسها كانو يطيحو فيها الريوس ! مايمكنش هاد التناقض بين المنصب و التفكير ! راه من الشروط لي خاص تتوفر فالشخص لي كايدافع على حقوق الانسان انه يكون كايعرف بلي كي البيض كي الكحل كي المثلي كي الغيري كي الراجل كي المرا ! راه حشومة نهضرو مع وزير حقوق الانسان على ابجديات الدفاع عن حقوق الانسان و تعريف كلمة حقوق و تعريف كلمة انسان. هادي شهر المغرب الرميد فجنيف رفض توصيات ديال مجلس حقوق الانسان بخصوص مجموعة من القضايا فحال الحق فالاجهاض و تجريم العلاقات خارج اطار الزواج و الافطار العلني فرمضان وبعض القوانين القروسطية لي خلات المنظمات الدولية ديال حقوق الانسان يسلخونا سلخة الكلاب قدام المنتظم الدولي. هادي شي أيام فيديو ديال مثلي دار بوم فوسائل التواصل الاجتماعي ! السيد غتاصبو خوه و لاحتو عائلتو و عايش مكرفص فحال الكلب حيت مثلي و مريض بالسيدا و بزاف ديال الناس تعاطفو معاه… البارح قاضي كايرفض يتبث النسب ديال طفلة صغيرة لباها واخا الحمض النووي كايثبت بلي ديك البنت بنت داك السيد استنادا للقاعدة الفقهية" الولد للفراش و للعاهر الحجر" و لي بسابها الولد لي تزاد خارج اطار الزواج ماكايتنسبش لباه، كايعيش كولد الحرام حياتو كاملة محروم من جميع الحقوق لي كايستوجبها النسب لباه و خصوصا الارث. و اليوم وزير حقوق الانسان كايعاير المثليين بالأوساخ و قالك عاد ليهم الشان ندويو عليهم ! واش حنا إنسان فهاد البلاد و لا هاد لقب انسان حتى هو و بالرغم من بساطته و بديهيته ولا خاصنا نعمرو مجموعة ديال الشروط باش ناخدوه على حساب گانة السيد وزير حقوق الانسان ! نتا مزيود خارج اطار الزواج ماشي انسان ! و نتا مثلي؟ تانتا ماشي انسان ! ونتا عزي ؟ مااشي انسان! و نتا مالك ؟ مزلوط تانتا ماشي انسان… ايوا على هاد الحساب ! سميوها وزارة حقوق الإنسان المعترف به من طرف السيد الرميد شخصيا و من لا يعرفه.
