التحرش الجنسي. حتى لفوقاش غنبقاو ساكتين على هاذ الكبت والتخلف: رئيس مصلحة تحرش بمدونة وفرشاتو

نشرات المدونة وكاتبة الراي سابقا ف”كود”، زينب بنموسى تدوينة على حسابها الشخصي عبر الفيسبوك، كتعاود فيها على التحرش الي تعرضاتلو، حسب هدرتها، من طرف رئيس المصلحة ديال المقاطعة 10 في وجدة.
ورفقات بنموسى التدوينة ديالها، بميساجات وتسجيلات هاتفية بينها وبين رئيس المصلحة، حسب ما قالت، الي فعلا كيبينو ان هاد الاخير تحرش بيها وبسل كاع.
هاد التحرش الجنسي الي ولا عندنا كتير بزاف فهاد البلاد لدرجة وحدين ولاو كيعتابروه عادي… وهو نتيجة ديال الكبت، والتخلف والجهل لي كنعيشو فيه، غادي يخص قريبا نلقاو ليه حل، ولا العيشة غاتولي مستحيلة للمرأة المغربية فبلادها.
مخاصناش تطبيق الكتروني، ولا حافلات فالغوز، خاصنا الترابي للصغار ولكبار. الصغار يعرفو ويفهمو ان المرا انسان عندو حقو فالشارع وماشي اداة جنسية. ولكبار يمشيو يترباو لا دارو علاش ومايبقاوش سايبين.
وهذا ما جاء في تدوينتها:
“رئيس المصلحة فالمقاطعة 10 وجدة. من بعد ما تحرش بيا فالبيرو ديالو كيفما كتبت قبل فواحد البوسط، وخا هكداك خديت باسبوري ومشيت بحالي حيت مابغيتش نكبر الموضوع فلول.
اليوم الصبح باقي مصر انه يعيطلي علما ان نمرتي ماعطيتهالوش حتى بخاطري وخداها بحجة أنها ضرورية بالنسبة للباسبور.
هانا سجلتو وها الميساجات ديالو. وغادي غير نرجع لوجدة نحط شكاية بما انني دويت مع موظف فنفس الادارة وكنت كانساين انه ماغايعاودش يدير لي هاد l harcèlement و كنت مقررة نجمع هاد الموضوع ولكن بدون نتيجة.”
الرابط:
رئيس المصلحة فالمقاطعة 10 وجدة. من بعد ما تحرش بيا فالبيرو ديالو كيفما كتبت قبل فواحد البوسط، وخا هكداك خديت باسبوري ومشيت بحالي حيت مابغيتش نكبر الموضوع فلول.اليوم الصبح باقي مصر انه يعيطلي علما ان نمرتي ماعطيتهالوش حتى بخاطري وخداها بحجة أنها ضرورية بالنسبة للباسبور.هانا سجلتو وها الميساجات ديالو. وغادي غير نرجع لوجدة نحط شكاية بما انني دويت مع موظف فنفس الادارة وكنت كانساين انه ماغايعاودش يدير لي هاد l harcèlement و كنت مقررة نجمع هاد الموضوع ولكن بدون نتيجة.(الميساجات فكومونطير)
Publiée par Benmoussa Zineb sur Samedi 14 juillet 2018