بعيدا عن المجرد الانسان !دويو علينا و جيو علينا ! المجرد فنان ذكي و موهوب و عندو گاع مقومات النجاح

حيت كانآمن بديك
” Il faut rendre à César ce qui appartient à César”
غانقولكم بلي سعد المجرد فنان ذكي و موهوب مورا ماسمعت الأغنية ديالو الاخيرة ! كازابلانكا
ايه ايه ! بعيدا عن الحياة الشخصية ! و عن المجرد الانسان ! و عن لافيرات ديال الاغتصاب ! نقدرو نحطو هادشي دوكوطي و نشوفو المجرد الفنان ! و اكيد غايبان ليك فنان ناجح بمقاييس النجاح الحالية طبعا.
غاتقوليا و قضايا الاغتصاب لي تابعاه ؟
غانقولك شوف آولد عمتي ! لاكنتي ماقادش تفصل فراسك بين الحياة الشخصية للانسان و المنتوج الفني لي كايقدم غير بلا ماتقرا هادشي.
اولا كبيرة : صوتو زوين يمكن تصنط لأي أغنية غناها، موال، او اغنية خليجية او مغربية و حتى بدون موسيقى و لا مؤثرات صوتية صوتو واعر و كايغني بإحساس …
ثانيا صغيرة: عكس باه لي صوتو زوين و ماطفروش ! المجرد فنان ذكي، صنع الستيل ديالو بوحدو ، الستيل ديالو لي كايصرعو و لي بزاف ديال الفنانة كايحاولو يقلدوه فيه و ماكايعرفوش ! اغنية شبابية خفيفة، تقدر تسمعها ونتا شاد الطريق فالطوموبيل و لا فبواط ! الريتم ديالها فيه حيوية و نشاط ! طبعا المجرد ماكايغنيش ليك نتا آ عمي لي كاطلق راحلة ديال المرحوم الحياني فاش كاتكون نتا و الحاجة فالدار كاتشربو القهوة بلا سكر حيت مانعو عليكم الطبيب و تفكرو يامات لافاك !داكشي علاش لا داعي تقارنو بالعربي باطما و بعبد الوهاب الدكالي(شوف غا سميتهم شحال قاسحة تكرط بيها ليدام من مقلة د الزيت) و تقوليا ” آش هاد الخرا كايغني هاد المجرد” حيت المجرد اساسا ماكايغنيش ليك !
المجرد كايغني للجينيراسيو ايگريگ y ! و جينيراسيو زاد z
وليدات التيساع وليدات التسعين و الالفين ! وليدات الطابليط و لانتيرنيت و الكاطجي … و الماكلة الخفيفة و الهضرة الخفيفة و الاغنية الخفيفة ! و زطق زطق نوض على سلامتك تختنتي !
ثالتا : المجرد زين ! زين! وجهو زين ! فورمتو زينة ! بشرتو زينة ! سنيناتو مستفين ! و هادشي طبعا كايعاون الفنان ! يكون عندك وجه اشهاري كايضاربو عليه الماركات العالمية ماشي هي تكون عندك شي فاتشة معبسة آولد عمي و شي كمارتلكلب ماتشوف فيها لا موحمة و لا شادة فحبل! علاش كريستيانو كايدير الاشهارات حيت وجهو زين ؟ علاش شوميشة كادير الاشهار حيت وجها زوين !! راه الماركات العالمية تاهي كاتآمن بديك القضية ديال الدنيا بلوجوه و لاخرة بالزراوط.
وقت الصورة و الفيديو هادي آ عمي و الناس باغا تشوف الزين !
رابعا و اهم نقطة: المجرد ذكي و قاري ! ها شتي باش القراية و الداكا زينين ! الاختيارات الفنية ديالو غالبا غالبا كاتكون ناجحة ! عارف شنو كايدير و فين غادي ! نهار غنا بالمغربية فرگع السوق ! و نهار تلاح للسوق الخليجي فرگع السوق ! و هاهوا اليوم تلاح للاغنية الفرنسية و غايفرگع السوق ! وااا عمي وااعمي راه قبايلة قلت ليك دخل سوق راسك ! ماشي ديك الاغنية الفرنسية لي على بالك ! ماشي جاك بغيل و ايديث بياف ! دوك لي كايتسنطو لايديث بياف راه ماتو و ولاو فوسفاط ! المجرد كايغني لوليدات لي كايتسنطو لميطرغ گيمس ! و ام بوروكا و شوية ديال الفرونسي مخضرة باللفت المغربي ! وليدات الضواحي و المغاربة الخفاف.
المهم دويو علينا و جيو علينا ! السيد فنان ناجح بمقاييس عصره ! عندو قاعدة جماهيرية كبيرة من المغرب تال بيروت مرورا بالقاهرة و الدوحة ! و اختياراتو الفنية ذكية ! و شاااااق طريقو بمقدة !
ولكن للأسف تا لين ماخطاتو زولة