الكليب لي صور سعد مباشرة مورا ماطلقوه من الحبس ماشي فصاليحو ! لمن كايقول سعد المجرد "انا ماشي ساهل" و لشكون كايقلز من تحت الجلابة ؟ و شنو هاد العنجهية فالتعامل

التواصل من الحوايج المهمة لي كايهتم بيها الفنان ! و فنان بحجم سعد المجرد تالاماكنش عندو هوا شخصيا مع التواصل خاص يجيب مسؤول تواصل يوريه و يوقف معاه و يخدم ليه على الصورة خصوصا فهاد الفترة الحرجة لي كايمر منها فالمسار الفني ديالو و نوعية القضايا لي تابعينو "اغتصاب " "عنف" و لا كان عندو already مسؤول تواصل راه خاصو يبدلو و يجيب شي واحد بعقلو ! حيت التواصل ماشي غي خضرة فوق طعام و لا غي تخرييقة و صافي! التواصل فن و علم عندو ناسو لي ضابطين القواعد ديالو و أي شخصية عامة سوا سياسية و لا حكومية و لا فنية كاتهتم بالصورة ديالها قدام الناس كاتخدم معاها مسؤول تواصل قاد بشغلو.
حيت لي شاف ردود الفعل ديال سعد المجرد من خرج من الحبس لدابا غايشوف مجموعة ديال التصرفات صبيانية ماعندها تا علاقة بالتواصل لي خاص يكون عند فنان بالحجم ديالو مع الجمهور !" سعد المجرد" كايشطح ! "سعد المجرد داير فيديو كليب بأغنية "أنا ماشي ساهل" كايبين فيه شحال هوا فرحان حيت خرج من الحبس.
وي ! الله يحسن العوان ! الحبس صعيب ! و عادي أنه انسان مدوز ست شهور فالسيلون غي يخرج من الحبس واخا فإطار المتابعة في حالة سراح يكون فرحان و ناشط شوية على الأقل حيت غايشوف واليديه و صحابو يتهنا من ماكلة الحبس و القنطة ! و لكن سعد المجرد شخصية عمومية ! فنان عندو جمهور كبير ! و متابع بجرائم خطيرة و لي ماشي أول مرة غايتابع بسبابهم ! السيد تشد على الاغتصاب للمرة الثانية فحياتو و محطوطة ضدو شكاية ثالتة بالعنف و الاغتصاب لي مازال القاضي ماقررش فيها ! يعني السيد غارق تال ودنيه فالشبهات إذا عتابرناها غير شبهات !! فعلى الأقل فاش يطلق الله سراحو عوض مايدير فيديو كليب برهوش كايبان بيه باغي يقلي السم لشي جهة غير معلومة و يقوليهم "أنا ماشي ساهل" يدير شي ندوة صحفية و لا يعطي شي تصريح محترم لشي جريدة يجاوب فيه على التساؤلات ديال الجمهور ديالو بطريقة ذكية لي تقدر ماتأثرش على سير المحاكمة.
حيت أي واحد شاف داك الكليب الأخير لي دار سعد المجرد مع واليديه و صحابو كايشطح و كايضحك و ناشط و كايغني "أنا ماشي ساهل" يقدر يؤول الكليب كيما بغا ! و من بين التاويلات لي كاينة هي ديك "انا ماشي ساهل" تكون كاتعني " أنا ندير لي بغيت و نخرج براءة حيت انا ماشي ساهل" ماشي حيت "أنا بريء" ! و فهم يا الفاهم!
لمن موجه داك الكليب ؟
للضحية الأولى ديال الاغتصاب لي كاينة فميريكان ؟
لللورا بريول الفرنسية لي متاهماه بالاغتصاب و العنف ؟
للقاضي لي غايحكم عليه؟
للمنافسين ديالو فالمجال الفني ؟
لمن كايقول ‘سعد المجرد' أنا ماشي ساهل ؟
بزاف ديال الأسئلة كانطرحهم على راسي فاش كانشوف داك الكليب الأخير ديال سعد المجرد و لي كايبان ليا كايلعب ضدو ماشي فصالحو !
فظرفية فحال هادي لي كايمر منها سعد المجرد ! و التهم لي متابع بيها كايفرضو عليه الذكاء و التواضع فالتعامل بعيدا عن العنجهية ! القضية راه فيها اغتصاب و عنف و ماشي اول مرة غايتجرجر "المعلم" فالمحاكم بسباب هادشي ! القضية راه فيها كيفاش كايشوف مول " أنتي باغية واحد" المرا و شنو كاتعني ليه.
إذن لحد الساعة و قبل ماياخد البراءة ديالو بصفة قطعية ! من الأحسن ليه يدير بروفيل با !