كاتشوف حتى كاتعيى وكاتلقى بلي ماكاينش لي غايخرج على هاد البلاد قد ديك الجملة الشهيرة ديال ” ولكن حنا دولة اسلامية” لي كايتخباو موراها أعداء الانسان عشاق الكبت و الجهل و القوانين القروسطية

الله على الشجاعة !
الله على المعقول
الله على السياسيين لي عندهم الجرأة باش يشدو الثور من گرونو !
سمع سمع آ ولد عمي الكلام و نقي ودنيك مزيان
” احنا دولة مدنية”
احنا ماعندناشي علاقة بحكاية الدين و القرآن
احنا عندنا التعامل مع الدستور لي أحكامو آمرة
و نحن في دولة مدنية”
غير هاد الجزء من آخر تصريح د الرئيس التونسي باجي قايد السبسي يثلج الصدر ! بالعربية تاعرابت كايبرد الگلب !
خلافا للسياسيين العرب اونجينيرال ! لي عندهم مع كثرة البلا بلا و اللف و الدوران ! و ديك الهضرة ديال ما فتئ و ما نفك و ما عتق ! و اخيرا غانعيش حتى نشوف سياسي فحال باجي قايد السبسي عندو الشجاعة باش يدافع على مشروعية المساواة فالارث و بلا كثرة الهضرة يدخل طول و عرض فالمعارضين وبالرغم من ضغط الشارع و الضغط د اللحايا يقول ليهم بلي “تونس دولة مدنية ماشي دينية” ! و بهاد التصريح غايكون “ب.ق.س” دخل للتاريخ من اوسع ابوابه و دخل معاه تونس ! و خلا موراه المنافقين و الحسرافة و تجار الدين الى مزبلة التاريخ.
فالمغرب تقدر طير و تنزل و تدوي حتى تشبع على المساواة فالارث و على حقوق الاقليات الدينية و الجنسية و على الحريات الفردية ! غايجي أيتها بعرور و لا بعرورة يقوليك جملة وحدة كافية باش يسد ليك كرك بيها ” ولكن حنا دولة اسلامية” و غايكون عندو الحق.
ايه حقا حنا ماشي دولة ” اسلامية” فحال السعودية و لا داعش ! حنا دولة هجينة ماهي مدنية ماهي اسلامية و هاد الهجانة و هاد التخربيق هوا لي غايخلينا ماعمرنا نعرفو راسنا من رجلينا.
ولكن مانقدروش نكرو بلي بزاف ديال الناس كايتخباو مورا هاد ” ولكن حنا دولة اسلامية” باش يكاموفليو الكبت ديالهم و العقلية القروسطية الخامجة لي عندهم ! باش يحاربو الحداثة و الجمال و الفن ! باش يحاربو الانسان توكور !
حيت ف”الدولة الاسلامية” و الدولة الدينية اونجينيرال ! المحور كايكون هوا الدين ! ماشي هوا الانسان ! و الاولوية كاتكون للدين ماشي الانسان ! الانسان كايجي غير خضرة فوق طعام !
النقاش لي جبدتي فاطار الحداثة كايتحسم فالبلا بديك الجملة الشهيرة ديال ” و لكن حنا دولة اسلامية”
بغينا المساواة فالارث
ولكن حنا دولة اسلامية
بغينا حقوق الاقليات الدينية تكون مضمونة و يمارسو شعائرهم بكل حرية
و لكن حنا دولة اسلامية
بغينا المغاربة المسيحيين يمارسو العبادات ديالهم بحرية
ولكن حنا دولة اسلامية
بغينا الدولة ماتبقاش دخل فزكاك الباشار بقوانين قروسطية فحال القوانين ديال تجريم المثلية و تجريم العلاقات خارج اطار الزواج
ولكن حنا دولة اسلامية
و سبحان الله العظيم هاد الجملة ديال ” ولكن حنا دولة اسلامية” كايكونو اختصاصيين فيها واحد النوع د الباشار عند بالو فهايمي و واعر و عارفها باش منفوخة ! كايگولها و نافخ صدرو زعما صافي لافان ديال النقاش هي هاديك و ماعمرك تسمع هاد الجملة ديال ولكن حنا دولة اسلامية فشي نقاش بين شي جوج كايهضرو على ديك البنت لي تگريسات فالزنقة البارح و خسرو ليها وجها الشماكرية و لا شي جوج كايناقشو الرشوة لي مستفحلة فالمقاطعة و الادارات و مظاهر الفساد الحقيقية…. هاد الجملة كاتجبد غالاكان شي درويش جايب صاحبتو للبرتوش و الجيران معيطين ليه على صحاب الحال و لا فشي نقاش على الحريات الفردية فاش كايتزمت بنادم كايخرا من فمو هاد للجملة ديال ” و لكن حنا ….”
ايه ولكن شنو ؟ هانتا ” دولة اسلامية” قضيتيها ؟ كاينة شي دولة محترمة كاتكون دولة دينية ؟ طبعا لا !
الدولة خاصها تكون دولة مدنية ! كاتبنى على اساس المواطنة و كفى ! و الاعتبار الاول و الاخير كايكون للمواطن كيف ما كان المعتقد ديالو ! و الدين خاصو يبقا فالجامع و فالدار و فالحياة الشخصية للافراد ! راه تركيا لي كايموتو عليها الخوامجية و كايسيفطو ولادها يقراو فجامعاتها دولة علمانية.
شحال هادي الناس المحترمة حسمات فهاد النقاش ديال واش القوانين خاصها تجي من عند شي حد ! و لا خاصنا نجلسو فوق الطبلة و نحددو القوانين لي غانعيشو بيهم باش نعيشو فسلام؟ و ووصلو لخلاصة انه ماكاين ماحسن من الطبلة ! نطراسيو التيران و نحددو القوانين لي غانعيشو عليها و نطبقوها و نردعو لي ماغايمثاتلش ليها و هاهوما عايشين بيخير و على خير ففرانسا و بلجيكا و سبانيا و السويد و كايظلو يهربو عندهم دوك لي عايشين فالدول ذات المرجعية الدينية هاربين من الجهل و الفقر و الحگرة و الظلم …
هادشي علاش الصراحة حسدت توانسة على هاد الصراحة لي عايشين فيها و على هاد الخطوة الكبيرة لي دارو !
و حنا ؟ حتى لين
غانبقاو عايشين فهاد الرفيسة العمية ؟ تالين غانبقاو عايشين فهاد المرقة البايتة ؟
غايبقاو يسلخو فينا المنظمات الدولية و فينما كاين شي حدث عالمي يجبدو لينا المحضر ديال حقوق الانسان و عدم احترام الاقليات … واش مكتوب علينا نبقاو جارين هاد الضوسي فحال شي خرية ؟
كانصورو المغرب بالدرونات ملفوق فيه الطرامواي و الطرقان و السدود و التيجيفي و موروكومول فنفس الوقت لي العيالات لي غير حيت عيالات كايورثو النص !
واش ماشي قمة السكيزوفرينيا ؟