بعد مصر وتونس، بنسلمان غادي للجزاير

بعد دول الخليج و مصر وتونس ، ولي العهد السعودي محمد بن سلمان المتهم بالامر بقتل الصحفي خاشقجي و التورط ف حرب اليمن و حبس العديد من الامراء السعوديين غادي يزور الجزاير
الجزاير رسميا ماعندهاش اي مشكل ف هاد الزيارة على عكس تونس اللي المجتمع المدني فيها محيح و رافضها، ف الجزاير يالاه حركات اسلامية صغيرة تابعة للاخوان المسلمين و اللي عندها علاقة بقطر اللي قالت ف بياناتها انها كتحتج على هاد الزيارة بحال حركة البنا ءالوطني و حركة مجتمع السلم بالاضافة الى حزب العمال الاشتراكي اللي الزعيمة ديالو لويزة حنون معروفة.
وقبل موعد هاد الزيارة، استقبل وزير الشؤون الخارجية عبد القادر مساهل، الاثنين، سفير المملكة الجديد عبد العزيز بن إبراهيم العميريني، وقدم المعني "خلال اللقاء نسخة من أوراق اعتماده.
الصحف الجزايرية قالت ان الجزاير بغات تدير تغتنم هاد الزيارة باش يهضرو على سعر النفط اللي السعودية كتزيد ف الانتاج و كترخصو بزاف ارضاءا لادارة ترامب.
لكن الغريب وهو ان وزير الخارجية الجزايري جلس تا دازت شهرين و الامير غادي يجي عندهم عاد خرج بيان كايدين فيه رسميا قتل خاشقجي وكايقول ف لغة ديبلوماسية ان الجزائر تثق في العدالة السعودية..
للاشارة المغرب ماكاينش ف برنامج هاد الزيارات اللي بداها بنسلمان باش يقاد صورتو اللي تشوهات قبل ما يمشي للارجنتين..و حسب الاشاعة اللي كاينة ف السبب هو رفض الملك محمد السادس استقبال الامير شخصيا في المطار في حين ان الغالب ان العلاقات المغربية السعودية اللي تدهورات هي اللي خلات الامير اصلا مايديرش المغرب من الاول ابتداءا من سحب المغرب قواته ف التحالف العربي الى تصويت السعودية على الملف الامريكي ف المونديال و غيرها من الحوادث.