عامل لفقيه بنصالح تقولب. رفض دعوى رفعها ضد ارامل وورثة موظفي الداخلية

اليوم مع الثالثة والنصف ديال العشية، على شوية ويطيرو الناس الحاضرين في المحكمة الابتدائية بالفقيه بن صالح بالفرحة، بعد نطق القاضي الحكم برفض دعوى الافراغ اللي رفعها محمد قرناشي عامل الإقليم ضد أرامل وورثة موظفي الداخلية باش يخرجهوم من السكن الوظيفي بشارع محمد الخامس في الحي الإداري.
المحكمة شافت بأن العامل قرناشي تلاح للشبوقات وبأنه ما عندوش الصفة بتاتا باش يرفع دعوى الافراغ.
وكانت كود أول منبر إعلامي تطرق لهاذ الموضوع تحت عنوان”نايضة ما بين عامل الفقيه بن صالح وجنرال الصحافيين حول سكن وظيفي”.
محمد مشهوري الملقب بين صحابو وزملائه “الجنرال ” دار حملة شرسة في مواقع التواصل الاجتماعي، بين فيها ان هاذ العامل ما فاهمش حتى القانون وتطاول على اختصاصات لفتيت ورئيس الحكومة، وتبع نصائح لوبي العقار بالمدينة اللي كان مخطط يخوي حتى أرامل المخازنية ديال بيرو اعراب من ديورهم.
دبا اليوم ناس الفقيه بن صالح كيتساءلوا واش باقي عند قرناشي الوجه باش يخرج للشارع علما أنه ديما ساد عليه في الفيلا الفخمة ديالو الملاصقة مع العمالة؟