فضايح الكان. نجارة وخرازة عندهم اعتماد « الكاف » كصحافيين وكيعرضو عليهم مصريون بالبلاطوات. شخص ينتحل صفة صحافي اسمه عادل الرحموني قدم راسو رئيس الوفد المغربي. وزارة الاتصال: ما عندوش الملاءمة والمجلس الوطني: رفضنا ليه بطاقة الصحافة ما عندوش الشروط

اول ماتش للمغرب ضد ناميبيا بان واحد الشخص عندو اعتماد « الكان » كصحافي لتغطية المونديال الافريقي وبغى يوزع تذاكر كتعطى للصحافيين باش يدخلو للتريبون يتفرجو فالماتش وبعدها يكونو فزون ميكست او فالندوة الصحافية. هاد السيد كيشغل منصب كاتب عام جمعية رياضية كان اسسها مدير نشر « النخبة ».
هاد السيد اللي كان فمكناس وعندو سوابق وجا لكازا قدم راسو رئيس للوفد الاعلامي المغربي. كان معاه شي وحدين من اعضاء الجمعية الرياضية اللي هي وحدة من 4 جمعيات للصحافيين الرياضيين كاينين ف »الكان ». هاد السيد كيمشي للبلاطوات فقنوات مصرية باش يمجد عبد الفتاح السيسي اللي دار انقلاب على رئيس منتخب محمد مرسي اللي مات فسجنو حقاش ما عطاهش الدوا كيف قالو جمعيات حقوقية.
تنظيم كارثي بكل المقاييس وهو كيمشي للبلاطوات باش يصبغ هاد النظام القمعي. المهم هادا نقاش اخر.
اسمو ما تكتبش فتقرير دارتو الكاف على فضيحة ماتش المغرب ناميبيا. ولكن هدرو على واحد قدم راسو انو رئيس الوفد. كيقصدوه هو
شكون هو هاد عادل الرحموني واش هو صحافي ولا عندو شي مهنة اخرى. « كود » بحثات. المجلس الوطني للصحافة الجهة الوحيدة الدستورية اللي كتعطي بطاقة الصحافة اكدات ل »كود » باللي هاداك السيد ما عندوش البطاقة. اذن هو منتحل صفة صحافي وخاص النيابة العامة تحرك المتابعة ضدو بتهمة انتحال صفة مهنة ينظمها القانون. وفق مصدر « كود » فان هاد السيد قدم ملف ولكن ما عندوش الشروط باش ياخد البطاقة.
بعد البطاقة واش هاديك « ماتش بريس » اللي بيها خدا الاعتماد ديال الكان عندها الملاءمة؟ « كود » سولات وزارة الاتصال ونفات ان هاد الجورنال او جورنال اخر كيشرف عليه عندو الملاءمة. يعني انو كيخدم خارج القانون. وزير الاتصال محمد الاعرج قال باللي غادي يقدم ملفات عدد من الجرائد الالكترونية للنيابة العامة باش تحرك المتابعة حقاش خدامين خارج القانون.
دابا هادا ما عندو والو. خدام. كيفاش خدا الاعتماد ديال الكاف؟ الجامعة الملكية المغربية لكرة القدم اكدات ل »كود » ان هي ما عندها علاقة بالاعتماد ديال الكان. اللي وقع هو ان الكاف فتحات الاعتماد على صفحتها على الانترنيت. ما طلبات والو من الجامعة لا شكون الصحافي المهني لا شكون اللي ماشي مهني. ما داروش بحال الفيفا يضيف مصدر « كود ».
ولكن علاش الجامعة عطات الف دولار لكل صحافي معتمد واش من مقاييس؟ مصدر « كود » من الجامعة الملكية المغربية لكرة القدم اكد ان هاد الشي تعطى بعد اتفاق مع الجمعيات الرياضية من اموال عطاتها الكاف ماشي فلوس الدولة.
هاد الالف دولار توزعو على الصحافيين اللي منتامين لهاد الجمعيات. هنا ناض الصداع، اللي جاب معاه صحافيين كثار باش يربحو فلوس اكثر.
دابا ايلى كان شي قانون خاص يتابع هاد الشخص ومعاه شي وحدين اخرين حضرو للكان وعندهم اعتماد. ماشي صحافيين مهنيين. صحفهم ماشي معترف بيها =الملاءمة=. خاص تنظيم مهنة من الدخلاء احتراما ليها.