كيفاش رونار كيوجد رحيلو من المنتخب. قضية فجر وخروجو اليوم للريسيبسيون واعلانو تحمل مسؤولية الاقصاء

ايرفي رونار يقدر يكون حسم رحيلو من الاسود واخا عندو عقد مع الجامعة يسالي ف2022. اي منتخب بغاه يخلص اللي شروط فسح العقد ومريضنا ما عندو باس. لكن اش المؤشرات على هاد الرحيل والمستبعد جدا يكون للجزائر. هادي ديال الجزائر حسب مصدر ل”كود” هنا فكالينينكراد غير للمزايدة وصافي. طالقها وكيل اعمالو باش اما يخليوه يمشي بشروط افضبل ولا يعاودو معاه العقد وفكلتا الحالتين غادي يكون رابح
من المؤشرات اللي ممكن تفهم منها انو غادي يرحل هو اعلانو البارح فالندوة الصحافية قبل الماتش للمرة الثالثة وهاد المرة قبل الماتش ماشي بعدو باللي هو المسؤول على الاقصاء مسؤول على عدم تقديم عرض افضل والفوز. واخا انتاقد الحكم حمل راسو مسؤولية الفشل في الوصول الى الدور الثاني. يمكن بغى يقول باللي هادا اقصى ما يمكن يوصل ليه مع المنتخب المغربي وخاصو يبدل العتبة.
المؤشر الثاني هو ما حدث البارح فالتدريب مع فجر. لعاب فالمونديال هاز تلفونو. واخا يكون يسمح ليه يتصنت للموسيقى كيف قال مصدر ل”كود” واكدو هو فبيان نشراتو الجامعة٬ راه خطأ كبير. خطأ المدرب نفسو. واش در قال ليك راه كان سمح للاعبي زامبيا والكوت ديفوار يديروها. هاد الشي ما كانش فالمونديال وفالوقت اللي الصحافة كانت حاضرة. يعني فيها ما فيها ثانيا باش رونار يجبد هاد الدولتين اللي مشى منهم بخصومة راه يمكن يتفهم منها انو قرب يمشي من المغرب
ثالث مؤشر هو خروجو مع منتصف النهار كيف عاينت “كود” للريسيبيسون ديال لوطيل “ميركير” باش يتلاقى شي سيد وسيدة. كانت شوية الفوضى ديال الجمهور اللي اقتاحم اوطيل للعابة. رونار دارها فماتش ايران ولكن كان مع بنتو وكان فرحان وعارف راسو رابح وكيهدر مع الجمهور. دابا ما هدر مع حد ما سلم على حد. باينة عليه فعالم اخر.
مصدر ل”كود” قال باللي الامور ما بقاتش كيف كانت فالمنتخب باش وصل لروسيا. ولى التسيب ورونار متساهل بزاف بزاف.
على اي بعد ماتش الليلة كاينة ندوة صحافية وفيها غادي نعرفو ردو اللي ممكن يكون ديبلوماسي ولكن غاديين نعرفوه. حقاش هاد السؤال على لسان كل واحد