فضايح وشوهة كبيرة. ايلى بغيتي تولي مدير نشر "جريدة رقمية" غير ف5 ايام تولي صحافي. صحافية صيبات 12 ملاءمة وثمن الاحتيال ما بين جوجت المليون ومليون وكاين اللي ولى دخلو 6 المليون شهريا

في لحظة من البرنامج الشوهة اللي دار على الصحافة الرقمية وجاب جامع كولحسن لسبب عارفو غير هو وخاص بحث بالليل والنهار باش نعرفو٬ جاب ليه شي حد كاليك عندو شي تنسيقية. هاد هاد الشخص باللي خاص جوجت المليون سنتيم اليوم باش تقلب على صحافي مهني يدير ليك الملاءمة. هاد الخطأ اللي خرج ليه من فمو بلا ما يعيق كيغطي فضايح كبيرة كتوقع دابا.
مع دخول قانون الصحافي ومدونة الصحافة والنشر حيز التنفيذ خرجات للوجود تجارة جديدة. هادوك اللي كنا كنسميوهم نجارة ما بقاش عندهم الحق يديرو جريدتهم ولكن كاين احتيال يجيبو شي صحافي مهني عندو ديبلوم او يقلبو ليه على ديبلوم موجود وكثر بزاف وها هو خدا الملاءمة من المحكمة ويمكن يدفع لبطاقة الصحافة. فضايح الدولة مشجعاهم من وزارة العدل الى وزارة الاتصال.
كاين اللي ترفح كاع بحال شي صحافية قال ليك دارت لحد الان وفق مصدر من النقابة الوطنية للصحافة المغربية ل"كود" 12 ملاءمة اي انها قدمات 12 طلب باش تولي مديرة نشر. ما نديروش ليها جوجت المليون للشهر غير 5 الاف درهم للشهر غادي يطلع ليها فالشهر 6 المليون سنتيم. هادي دارت تجارب فالخليج وماشي فالصحافة، واخا بنت المعهد ديال الرباط ما كيعرفها حد فالمهنة الا فئة قليلة. مصدر النقابة قال ل"كود" ان هناك بعض التجار بانو فهاد القضية وان هناك عدم صرامة الادارة او القضاء فمحاربة هاد القضية.
دابا مع التسيب وكما تظهر وثيقة حصلت عليها "كود"٬ كاين شي تخربيقة كتسمي راسها معهد كتقدم تكوين للصحافة ف3 اشهر ب290 درهم ونفس التخربيقة كيدير تعلم الخط والتنمية الذاتية. بحال هاد الديبلوم واقل منو يمكن تتقدم وتاخد الملاءمة. واحد فبوسكورة كيدير تكوين سريع وبالزربة
لفضايح الحكومة هي المسؤولة عليها. حقاش غدا باش تولي المشاكل ما يقدروش يحبسوها فالصحافة. هما اللي وصلونا لهاد المهزلة. هما اللي وصلو واحد بحال جامع كولحسن يولي يجيب بحال هاد العينة ويعطيها دوز فالتلفزيون. تصورو توقع فشي دولة بحال تونس او الجزائر اش غادي يوقع.
الحل المؤقت ان هاد المهازل توقف فوزارة الاتصال اولا وتنشر هاد الوزارة اللائحة كاملة باش نعرفو شكون اللي باع وشكون اللي شرا وكيفاش ولى صحافي. كلشي الصحافيين يخرجو لينا شواهدهم واش قراو.