ها علاش الاتحاديين مدلولين هاد ليام شي ما خداش عطلتو وشي ولى لاصق فلشكر اللي مانعهم يهدرو على التعديل الحكومي فالاجتماعات. ها اللي باغي يكون وزير ها اللي منيش على منصب كبير

المكتب السياسي للاتحاد الاشتراكي طايح عليه الذل. الكاتب الاول للحزب ادريس لشگر قاطع عليهم لخبارات بخصوص التعديل الحكومي المرتقب. قاطع عليهم حتى مناقشة هاد لخبارات. “ما عمرنا تداولنا فهاد الموضوع. ما فراسنا ما نعاودو” يقر عضو بالمكتب السياسي ل”كود”.
وفق مصادر “كود” فهاد التعديل المرتقب زاد فدل الاتحاديين “شي ما خداش حتى العطلة فالصيف وبارك مقرق فدارو كيتسنى ينالو شي نصيب وشي ولى بحال ظل لشكر لاصق فيه فين ما مشى”.
طبعا فهاد الاتحاديين كاين اللي طامع يكون وزير واخا خطاب الملك فالعرش واضح. باغي الشباب والكفاءة وهادو بجوج ما كاينة حتى فشي عضو من اعضاء المكتب السياسي للحزب “واخا هاكدا طامعين شي وحدين” يشرح مصدر “كود”.
كاينة فئة اخرى من المكتب السياسي طامعة فتعيين اخر “حاطين عينيهم على تعيين فمؤسسات اخرى ولشكر طالق الوعود على كلشي” يضيف مصدر “كود”.
دابا لا نقاش لا حوار لا حديث عن التعديل. كلشي بيد لشكر اللي كيتشاور غير مع لحبيب المالكي وصافي. هاد الاخير كان كيروج وفق مصادر “كود” لاسم لشكر يدخل الحكومة وبدا يطلب عليه. الملك باغي الكفاءة والشباب والمالكي باغي يزيد يقودها على لبلاد بتعيين امثال لشكر.
ادريس لشكر عارف هادي اخر فرصة ليه باش يدبر على راسو فالحكومة ولا يدخل بنتو لهاد الحكومة. هاد الشي علاش محتاقر كاع اعضاء المكتب السياسي وكاع الاتحاديين. ما كيقول ليهم والو. باغي يقضي حاجة بالكتمان.