يوميات ابيدجان. لقجع مستريسي كثر من اللعابة والاسود تايقين فراسهم والضغط الشعبي الايفواري كثار بزاف على الفيلة

خلال الحصة التدريبية للمنتخب المغربي لكرة القدم امس الخميس بملعب "اسيك ميموزا" بالكوت ديفوار٬ كانت الاسود هادئة. ما باينش فيها شي جوع ولا شي عنف ولا شي رغبة للافتراس. اسود شبعانة وترانكيل. امين حارث قال فتصريحو باللي الضغط اكثر على المنتخب الايفواري منه على المنتخب المغربي. كاع الصور اللي تنشراتها "كود" واللي غادية تعاود تنشرها كتبين هاد الهدوء. حتى فالتداريب اللي كانت مفتوحة امام الصحافة شي نص ساعة او اكثر٬ كان واحد الجو سين نقي مزيان. كيشعروك اللعابة باللي كاينة طاقة ايجابية سايدة فهاد المعسكر. ماشي كلهم هادئين. كاينين اللي متوثرين اكثر من اللعابة. حالة فوزي لقجع رئيس الجامعة الملكية المغربية لكرة القدم. داير بحال هاداك اللي كيتسنى مراتو فالصبيطار باش تولد. منشغل بزاف. كيتحرك كيبقى بوحدو كيرجع شوية عند صحابو. "مشغول بزاف ومركز بزاف وباغي رباح ماشي غير ليه كرئيس جامعة وكل رئيس جامعة كيبغيه ولكن للمغاربة. طعم الانتصار كيفيق بلاد كيعطيها الامل كيزرع فيها روح جديدة. كلشي كيتحرك" يشرح صديق له ل"كود".
المهم السيد حاضر بزاف. معاكم بلا ما يدخل فيهم. واقف باش "ما يبرزطهم حد. يخليهم مركزين مائة فالمائة". يضيف المصدر ل"كود".
هاد المباراة اللي معول عليها المغرب باش يمشي للمونديال عندها طعم اخر عند الايفواريين. اشهار فاحدى القنوات المحلية كيلخص كلشي. الاشهار كيبدا يهدر على الفيلة. على قدرتهم على العيش الجماعي. على التحدي ثم على الاسود المنطوية المنعزلة على نفسها. ومن بعد كيبان ليه المواجهة بين المنتخبين. كيصوروها مواجهة فاتت المصيرية بحال ايلى بيها كلشي غادي يوقف فالكوت ديفوار. هاد الشي نقلاتو "كود" البارح. كيفاش كاين تهييج لشعب. صحافي ايفواري من الاذاعة المحلية قال ل"كود" في هذا الصدد ان التهييج داخل فعملية التحفيز الجماعية للمنتخب. طريقة للضغط على الخصم اكثر من الضغط على اللاعبين المحليين. لدرجة ان النجم سيرج اوريي قال باللي منتخبهم غادي يلتاهم الاسود.
باينة هاد الضغط اكثر على الايفواريين منهم على المغاربة. اللي شفنا البارح لعابة صغار ولا كبار هادئيين ناشطين