اناري ادريس لشكر غادي يتصطى على التقاعد. شكشك وسب وعربط وهدد نواب حزبو بحال ايلى الحزب فيرما ديالو: غادي نطردكم واللي كتب فالفايس نجري عليه

اجتماع ماشي ساخن ولكن ماسخ دوزو حزب الاتحاد الاشتراكي البارح فالرباط. المكتب السياسي للحزب ولى جلسة للسباب والمعيور من ادريس لشكر الكاتب الاول للحزب لبعض الاعضاء في مجلس النواب.
وفق مصدر “كود” فان لشكر حيح وكشكش وعربط بل وهدد البعض اللي عبر عن موقف ضد تقاعد البرلمانيين. السي ادريس باغي يدوز التقاعد بزز واخا يالله عندو 20 برلماني. قاليك متفق مع الاغلبية. واش هادا بعقلو؟ راه العدالة والتنمية صافي ولاو ضدو. يعني المشروع طايح.
وفق مصدر “كود” فان لشكر هدد رئيس الفريق فمجلس النواب ونواب اخرين باش يطردهم كاع. اواه السي ادريس كيفاش تقدر تطردهم. واش بعقلك. كما منح كل واحد يكتب ضد هاد المشروع حتى فالفايسبوك واللي كتب هددو بالطرد
الغريب ان رئيس مجلس النواب واللي هو رئيس المجلس الوطني لحزبو لحبيب المالكي صرح باللي ما عندو موقف من هاد الشي ديال التقاعد وباللي من حق النواب يعبرو. واش غادي يطردو حتى هو ادريس ولا اللا. باينة لشكر خرج من اجتماع الاغلبية اللي ما وقع فيه والو وخرج الفقصة ديالو فحزبو