كأس العرش…الجيش تبورد على الوداد بثلاثة فالكلاسيكو

الجيش الملكي تبورد في الكلاسيكو على الوداد بثلاثة لواحد اليوم الثلاثاء، ضمن مؤجل سدس عشر نهائي كأس العرش.
أغلب المتتبعين كانوا كيتوقعو فوز الوداد البيضاوي بسهولة، اولا لأنه لعب الماتشات بزاف فليامات اللخرة، وقدم فيها مستوى جيد، وثانيا أن الجيش الملكي كيمر بمرحلة انتقالية وما بداش مزيان في البطولة.
لكن الجيش خرج من هاد الكلاسيكو رابح بلامنيير، وكان قادر يربح أكثر من ثلاثة.
الوداد دخل المباراة، وهو واثق من نفسو وقام بمحاولات عديدة، لكن الجيش كان منظما دفاعيا واعتمد على الهجومات المضادة
مع بداية الشوط الثاني، بان بلي الجيش الملكي يقدر يماركي في أي لحظة، خصوصا بعد الهفوات، لي ظهرات فالدفاغ، وحتا الحارس ياسين الخروبي كان ليه دور فهاد الخسارة منين ارتكب خطأ سجل منو الجيش الملكي الهدف الأول بواسطة الإيفواري جوزيف كيدي.
هاد البيت نزل بحال قطعة الثلج على لعابة ديال الوداد، وشتت تركيزهم، الشي لي خلا الجيش يزيد الهدف الثاني بواسطة رضا سليم.
واخا ايوب الكعبي ماركا للوداد الهدف الأول في الدقيقة التسعين، إلا أن رضا سليم زاد البيت الثالث، لي قضا كليا على طموحات الوداديين.
الجمهور لي حضر بكثافة ودار تيفو في المستوى خرج مستاء من هاد النتبجة، لي اعتبرها قاسية بالنسبة ليه، وفيهم من احتج ودار الفوضى بعد الماتش.