كيفاش الخارجية كتعاير. الفعفاع عاير شباط على قبال موريتانيا: تصريحاتك خطيرة وغير مسؤولة” وبوريطة للفعفاع على الجزائر: تصرفك ارعن ومتهور

سنة 2016 وباش كان بنكيران مضارب مع تشكيل الحكومة وكان اعلن ان الاستقلال معاه٬ خرج شباط اللي كان امين عام حزب الاستقلال انذاك بتصريح قال فيه موريتانيا مغربية. الخارجية اللي كان على رأسها ديك الساعة صلاح الدين مزوار او الفعفاع دارت بيان هاجمات هاد التصريح.
علاش نذكرو بهاد الشي؟ باش نعرفو كيفاش تكتب البيان ديك الساعة واش من عبارات دالمعيور توظفات وكيفاش تغيرات هاد العبارات اليوم للرد على اللي كان وزير خارجية من طرف اللي كان وزير منتدب عندو وقبل كاتب عام فوزارتو اللي هو ناصر بوريطة الوزير الحالي للخارجية والتعاون.
ديك الساعة خرجات بيان الخارجية فواحد الاثنين باش تهاجم شباط اللي سمات تصريحاتو على موريتانيا ب”التصريحات الخطيرة وغير المسؤولة للأمين العام لحزب الاستقلال حول حدود الجمهورية الإسلامية الموريتانية ووحدتها الترابية”.
وان المغرب او الوزارة “ترفض بشدة هذه التصريحات التي تضر بالعلاقات مع بلد جار وشقيق وتنم عن جهل عميق بتوجهات الدبلوماسية المغربية التي سطرها جلالة الملك نصره الله والقائمة على حسن الجوار والتضامن والتعاون مع موريتانيا الشقيقة” وان الرباط “يعلن رسميا احترامه التام لحدود الجمهورية الإسلامية الموريتانية، المعروفة والمعترف بها من طرف القانون الدولي، ووحدتها الترابية”
كما وصفت التصريحات بانها تفتقد الى “النضج ولضبط النفس ، يساير الأمين العام لحزب الاستقلال المنطق نفسه الذي يتبناه أعداء الوحدة الترابية للمملكة والذين يناوؤون عودتها المشروعة لأسرتها المؤسساتية الإفريقية”. هاد الشي ف2016 وحينها كتبت “الاسبوع” ان هاد البيان صايبو بوريطة اللي كان كيف قلنا وزير منتدب فالخارجية ماشي مزوار اللي كان وزير للخارجية.
دابا جا تحليل قدمو صلاح الدين مزوار باعتبارو رئيس الباطرونا فلقاء نظماتو الفوسفاط بمراكش. هدر على مواضيع كثيرة منها الجزائر. دعا الجيش يتقاسم السلطة مع الشعب. كلام عادي ماشي بخطورة تصريح شباط. اقل من عادي. ومع ذلك جا بيان للخارجية وقح بزاف. كيبين السم اللي عند بوريطة والكره ديالو لمزوار. ما نساش ليه باش كان باغي يبعدو من الوزارة ويرسلو سفير.
تصريح عادي وبيان حقير. قال فيه بوريطة باللي "صلاح الدين مزوار، رئيس الاتحاد العام لمقاولات المغرب، اعتقد أنه يتعين عليه التعليق على الوضع الداخلي بالجزائر" وان الحكومة المغربية. هنا ورط الحكومة كلها٬ "تشجب هذا التصرف غير المسؤول والأرعن والمتهوّر”.
مع شباط كان “غير مسؤول وخطير” ومع مزوار اليوم “ارعن ومتهور”. شوفو الحقارة.
ماشي غير هاد الشي كاينة عبارة كتاهمو بالخيانة بشكل واضح "هذا التصريح أثار تساؤلات على مستوى الطبقة السياسية والرأي العام بخصوص توقيته ودوافعه الحقيقية". الخارجية كذبات حقاش ما كاين حتى شي حزب سياسي قال شي هدرة على التصريح او اثارو. الخارجية استغلات السياسيين والطبقة السياسية باش تبرر حقارة البيان.