تفاصيل مثيرة على عادل النّصاب اللّي بان كيتسمسر فملف قضائي.. ها علاش سربو ليه الفيديو وها شحال ديال لفلوس رجّع لعائلة المعتقلة

كشفت مصادر مطلعة، ل”كود”، بعض التفاصيل المثيرة في قضية عادل النصاب اللّي بان في شريط فيديو نشر بشكل واسع على مواقع التواصل الاجتماعي، وهو بصدد النصب على سيدة منقبة في مبلغ مالي بداعي أنه غادي يتدخل لتخفيض الحكم القضائي الصادر في حق والدتها.
وتشير المعلومات التي حصلت عليها “كود”، من المصادر نفسها، أن داك المنقبة وعائلتها مكانت عندها النية في الأول باش تسرّب داك الفيديو، مشيرة إلى أنها وثقات ما دار بينها وبين الموقوف باش يلا وقعو ضحية نصب غادي يعلموه بأنه مصور ويرد ليهوم فلوسهوم.
هنا بدات الحكاية ديال الفيديو. مصدر “كود” كشف على أنه مني تبين للعائلة أن السيد غير تفلا عليهم ومكاين لا تخفيف العقوبة من 8 أشهر إلى شهرين سارعوا إلى الاتصال به باش يرجع ليهوم فلوسهم، غير أن النصاب بدا كيتهرب ليهوم كل ساعة ورفض يرجع ليهوم لفلوس، وداك الساعة العائلة نشرات الفيديو بهدف فضح النصاب اللي كان أصلا رُوشِرْشِي.
وأضافت مصادر “كود”، أن المعني بالأمر رجّع لعائلة المعتقلة مليون سنتيم وبقات عندو 3 مليون سنتيم. العائلة تبين ليها أنها وقعت ضحية نصب واحتيال من قبل الموقوف اللي عندو سوابق فهاد المجال، خاصة أن السيدة اللي كيدعي أنه بغا يدخل ليها باش تحكم غير بشهرين حكمو عليه بعام ديال الحبس مما يفسر أنه مكاين لا تدخل ولا عبّو الريّح.