بثت "داعش" فيديوهات عن جرائمها في الموصل من اعدامات وعمليات ارهابية. الفيديوهات ديال "ولاية نينوي" واطلقت على العمليات "موكب النور" وبثت يوم ثالث يناير 2017. بعض هاد العمليات نفذوها شي وحدين عندهم القاب المغربي بحال ابو زيد المغربي وابو حديفة المغربي اللي دارو عمليتين في حيي "الانتصار" و"الاعلام". لكن العملية الثالثة وهادي كتهمنا اكثر ف"كود" منفذها هو "ابو مجاهد المغربي" او البلجيكي. هاد الطفل هو يونس اباعوض اخ حميد اباعوض مول العمليات الارهابية اللي زلزلات باريس يوم 13 نونبر 2015 واللي كانت المخابرات المغربية كالت للفرنسيين راه فاوربا ماشي فسوريا وتقتل مع حسنا ايت بلحسن. يونس اباعوض او ابو مجاهد البلجيكي او المغربي عندو جنسبة مغربية وبلجيكية عمرو 16 سنة. هاد الطفل قولب المخابرات البلجيكية واخا مرة اخرى المخابرات المغربية وفق مصادر ل"كود" حذراتها. حسب مصادر "كود" فان المخابرات البلجيكية دخلت في اتصالات مع الطفل يونس شهرين بعد عملية باطاكلان الارهابية اي يناير 2016. المخابرات البلجيكية عبر عائلة اباعوض خاصة اخته. لبلاجكة كانوا مقتنعين انهم قادرين يرجعو هاد الطفل لبلجيكا. كلشي وجدوه باش يخرج من الرقة فسوريا اللي هي عاصمة الدولة الاسلامية عبر الحدود التركية. لمغاربة كالو ليهم اودي راه غادي يضحك عليكم. راه يستحيل يرجع. وفق مصادر "كود" فالطفل اتفق مع المخابرات البلجيكية وعائلته باش يرسلو ليه عشرة الاف اورو. وفق مصادر "كود" فان هاد المبلغ وصلو فيما نفت مصادر اخرى ان يكون توصل به. لمغاربة وفق مصدر "كود" رددوا ليهم اكثر من مرة باش ما يصدقوهش وباللي غادي يستغل لفلوس باش يعطيهم لداعش. دابا العملية وقعات فاخر ايام 2016 وتبثات ان لمغاربة كانوا عارفين احسن من لبلاجكة. داعش مازالت تنظيم ارهابي خطير كيوظف الاطفال فعملياته الانتحارية.
