إينا بورجوازية آخويا؟؟! هاذ للي كاتسميها نتا ظلما وعدوانا بورجوازية، باش بغيتيها تدير حزب سياسي وهي ماعندهاش وعي طبقي بذاتها

عبد اللطيف اكنوش استاذ باحث في كلية الحسن الاول سطات /////
واحد الصديق عزيز عليا بزاااف داوي أنا وياه وهو يكًول ليا: "آجي آبا عبدو…علاش هاذ البورجوازية ديالنا ماتدريش حزب سياسي ديالها، وتدافع على مصالحها في مواجهة الفئات المتحكمة في الاقتصاد والسياسة باش يوضاح اللعب في البلاد…عوض هاذ الشلاهبية للي من عند بوهوم لا لون إديولوجي لا لون سياسي بحال الأرنب؟"
والله ما شعرت حتى نققزت من بلاصتي وكًلت ليه: "كون لقيت أنا شخصيا البورجوازية في هاذ البلاد والله حتى نعننكًها بيديا بجوج ونبوس ليها راسها…فاين شفتيها نتا هاذ البورجوازية…أنا بعدا ماشفت غير واحد الفئة ديال ولاد الحرام عندهوم الفلوس، وكايتبربصو معا المخزن ومع السياسيين إيلى لقاو ما يجررو منهوم حينت وللفو هاذ ردود الأفعال شبه السياسية، وكانشوفهوم كايبنيو القصورا والفيرمات ديال والو، وكا يلوحو فلوسهوم في العقار باش يديروه مصدر للريع غير المنتج للثروة، وعندهوم ثقافة ديال الفشور ودفعان الببخ وتقليد الفئات المخزنية التقليدية في كولشي…في العراسات، في شريان الطوموبيلات والقشاوش، وفي القصاير ديال والو…
"للي كانعرف، ويمكن نكون غالط، أن البورجوازية طبقة ديال الدممارة، طبقة غاراضها اللول والأخير هو مراكمة الفلوس واستثمارها من جديد في الأنشطة المربحة ليهوم ولباقي أفراد المجموعة الوطنية…الناس للي كاتفضل تسكن غير في شقة مزيانة، وتاكل ساندويتش معا الطناش في البيروات ديالها في وزيناتها، وتقتاصد الفلوس باش تستثمرها من جديد وباستمرار…
"ثم آجي نكًول ليك…هاذ للي كاتسميها نتا ظلما وعدوانا بورجوازية، باش بغيتيها تدير حزب سياسي، وهي ماعندهاش وعي طبقي بذاتها، وماعندهاش وعي بدورها التاريخي في التنمية، وماعندهاش وعي ببلاصتها بالنسبة للطبقات والفئات المجتمعية الأخرى؟؟ باش بغيتيها تدير حزب ولا الننمي؟؟
" بالنسبة لخوك، ماعندناش بورجوازية وماعندناش طبقة عاملة، وماعندنا حتى بعرة…عندنا غير الطشاش والببخ والتسنطيح والفشور والتهرب من المسؤولية الوطنية…اجمع عليا كررك وخلليني عليك عافاك غادي تدير ليا الحنافز وبوزللوم"…