الفيديو ديال مرات مسلم كايبين شحال العيالات دياولنا كايموتو على دور الضحية و هوما براسهم كايصنعو رجال فاشلين ماكايتحملوش مسؤوليات قراراتهم

انا درويشة ! انا ضريفة ! انا ربة بيت محترمة ! انا مستورة ! انا كانبغي راجلي ! انا كانحافظ على راجلي و ولادي ! هادي باختصار هي الهضرة لي گالت مرات مسلم فداك الفيديو لي بانت فيه باش تبين لينا شحال هي شريفة عفيفة زوينة ضريفة بنت الناس ! ضحية ديال واحد الانثى اخرى لي “دات ليها” راجلها و لي هوا طبعا ” ماعارفش كيفاش راه معاها ” ! و هوا مزيان و الله يعمرها دار و هي مزيانة الله يعمرها دار و الشريرة الوحيدة فالقصة هي صاحبتو الممثلة امل صقر.
اولا و قبل بسم الله الرحمن الرحيم ! هاد الهضرة انا من عندي كوليها آ ختي ! ماكايهمنيش انا شحال نتي باغا تباني بنت الناس زعما و ربة بنت ماهرة ! الزواج ماكايبناش على هاد التمسكين و الترهبين و الطهرانية لي كاتبغيو زعما تبانو بيها ! الزواج راه علاقة خاص فيها ميزان القوى يكون مضبوط و مقاد ! بلا داك التمسكين و الترهبين الخاوي ! صافي راجلك مشا مع مرا اخرى الله يلقيه السلامة ! تاواحد مامشروط عليه يبقا مع لاخور حياتو كاملة ! العلاقات كايطراو عليهم تغيرات ! الشخصيات دياولنا كايطراو فيهم تغيرات ! الاحتياجات ديالنا كاتتبدل مع الزمن ! يقدر يكون الزوج ديالك باغي شي وحدة يعيش معاها الحياة ! يقدر يكون كايعجبو ينعس معاها ! يقدر يكون باغي شي وحدة تلبس ليه و تتعرا ليه و يعيش معاها الاغراء ! يقدر يكون رتاح ليها ! يقدر يكون حبها ! ايه طبعا الخيانة حاجة خايبة و لكن اذا طرات و جاب الله الفراق خاص كولا واحد يقلب الصفحة و يعيش حياتو و ربي مافرق الريوس الا باش ترتاح !
بزاف ديال المغربيات كايصحابها راسها غير لاكانت دايرة الحجاب و داخلة سوق راسها و كاطيب مزيان للراجل و كاتولد ليه الولاد و كاتصبن ليه راها صافي زوجة كاملة مكمولة ماعندو لاش يشوف فشي وحدة من غيرها و لا يفكر ينهي علاقتو معاها ! و الطامة الكبرى انه كايصحابهم اذا بينو على شخصية ضعيفة قدام الراجل و خنوعة راه غايبقاو فيه و غايبقا معاهم ! في حين انه الندية فجميع العلاقات مطلوبة و خاص الراجل يكون مسطي باش يقلب على مرا لي كاتشبه للعبدة ! كايحشمو من الندية ! كايبقاو مخبيين الشخصية ديالهم ! مخبيين الانوثة ديالهم ! مخبيين الاغراء لي عندهم ! كابتين الشخصيات الحقيقية ديالهم باش يبانو حقا ما حقا ” بنات ناس و عائلات ” حتى كاتجي شي موجة كاتجمع ليها حب و تبن!
من جهة اخرى ديك الهضرة ديال ” راجلي معاها و ماعارفش علاش معاها ” ” داتو ليا ” ” داتو لولادو” ماعند امها حتى معنى ! راجلك آ لالة ماشي دري صغير غاتخطفو ليك امل صقر ! راه كتافو صح من كتاف الزحاف ! و لاكانت بيناتهم شي علاقة راه غاتكون بالرضى ديالو التام و الموافقة ديالو ! ايه يمكن غاتجيك ساهلة تقولي لراسك راه حقا مسكين ماعارفش علاش هوا معاها و تبغي تتخايلي بلي راه مسحور و لا مسيطرة عليه و لكن هادشي غير وهم و كذوب كاتكذبي بيهم على راسك و كاتبردي بيهم على راسك ! راجلك لادار الصاحبة راه بغاها و قلب عليها و استثمر وقت و مجهود و طاقة و فلوس معاها و هوا كايضحك تال النواضر.
بلا ماتبقاو تخربقو علينا ! راجلك مسؤول على راسو و نتي مسؤولة على راسك و كونك باغا تلعبي دور الضحية ماكايلغيش انك انسانة راشدة خاصها تتحمل قراراتها فالحياة و تتعامل مع الناس لي دايرين بيها بنضج.