كيفاش عشت تجربة العومان فشاطئ اسباني فيه العيالات كايعومو ببزازلهم عريانين ؟! الدراري صغار كايعومو فالبحر مع امهاتهم ببزازلهم عريانين ! كايترباو وسط البزازل ! كايشوفو البزازل ! نورمال يكبرو شبعانين بزازل و علاقتهم سوية مع جسد المرأة !

ماكانش فراسي البحر لي غانمشي ليه كايعومو فيه العيالات بالبزازل عريانين … حتى لقيت راسي مخشية وسط فيستيفال ديال البزازل ها الكوحل ها البويض ها السومر و الغوز .
عرفتي شنو هوا تكوني مغربية كابرة فالمغرب علاقتك مع الجسد تبنات على بزاف ديال العقد و تلقاي راسك مخشية وسط ناس كايعومو “عريانين” راه هذا لي كايسميوه الناس لوشوك كيلتيغيل ( الصدمة الثقافية)
تفكرت فاش كنت مراهقة كانقرى فالليسي ! كانت صاحبتي المقربة ” فدوى” عندها واحد البزازل اللهم صلي عليك آ رسول الله هي كاتقرا فالسانكيام و بزازلها شدو لاليصونص ! و كانت مسيكينة معقدة منهم ! لدرجة فحصة السبور ماكاتبغيش تجري و تلعب الباسكيط و لا الفولي باش مايتحركوش و يشوفو فيها الدراري و البنات و استاذ الرياضة ! و كانعقل فواحد الامتحان ديال السبور كان بزز منها خاصها تجري باش تاخد النقطة ، جرات ! و بداو بزازل فدوى كايتهززو ! هز حط هز حط … و الدراري كي قردة البابوان كايغوتو ! ولاد القسم و ولاد الاقسام الاخرى !… نورمال تاهوما البزازل الوحيدين لي كايشوفو هوما بزازل انس الغليض و بزازل مواتاهم و لكن مخبيين وسط الشراوط و البينوارات و النهار الكبير هوا نهار يشوفو شي بزولة بالزربة فميلتي فيزيون مع الثلاتة د العشية قبل مايفيقو مالين الدار من لاسييست. شوف الميزيرية الجنسية كي دايرة !
فاش سالات الجرية ولات فدوى حمرة حمرة حمرة فحال ماطيشة ! تعصبات و حشمات و فاللخر مشات للفيستيير و بكات…
فدوى كانت حارمة راسها من بزاف ديال الالعاب و الحوايج و هي ففترة لي كاتبني فيها علاقتها مع الجسد ديالها بسباب بزازلها ! و فحال بزاف ديال المغربيات تاهي مرا مرا كاتسمع ديك المعيورة ديال ” سيري يا مو بزازل” شي مرات حتى من مها لا ماعجبهاش تشطابها و لا عجينتها و لا تسيقها للدروج.
شوف دابا المعيور كيف داير ! بنادم كايعايرك بعضو منك عطاتو ليك الطبيعة و ماعندك مادير ليه ! عضو من الجسد ديالك و بغاك تكبر انسان سوي.
و حتى اليوم مازال بزاف ديال المغربيات معقدات من الجسد ديالهم ! من بزازلهم و تراميهم و شعرهم و وجهم و شنايفهم و كايزيدو يكحلوها عليهم ملي كايقولو ليهم آه حقا خاصكم تغطيو شعركم ! خاصكم تغطيو تراميكم ! خاصكم تغطيو ذرعانكم ! باش ماديروش الفتنة ! البنت كاتكبر معقدة من راسها ! معقدة من جسد عطاتو ليها الطبيعة كيفاش غانتساناو منها تكون انسانة سوية ! حتى الدورة الشهرية لي هي حاجة طبيعية كاتتربى على انها حاجة خايبة خاصها تخبيها و بلي باها و خوتها ماخاصهمش يسيقو ليها الخبار لا كانت فيها ! و يا ويلها شي نهار لانسات شي اولويز ديالها فالطواليط و دخل باها موراها ! كانعرف بنت كلات العصا حيت نسات اولويز فالطواليط !
تفكرت فدوى و بزاف ديال المغربيات وانا كانعوم فشاطئ اسباني وسط البزازل ! حدايا اسرة مكونة من زوج و زوجة و وليداتهم ! الأم كاتشمش ببزازلها عريانين و كاتجري مع ولادها باش تديهم يعومو ! و على ليسر حدايا مرا كبيرة تكون عندها ثمانين عام تاهي جالسة كاتقرا المجلة ديالها و معرية بزيزلاتها كاتشمشهم.
جميع انواع البزازل ! بزازل الربعطاشيات ! بزازل الأمهات ! العازبات ! الجدات ! بزازل كوحل ! بزازل بويض ! بزازل غوز ! من جميع الاحجام ! لي عندها تفيفيحات جابداهم كاتمشمشهم و لي عندها شكاوي د اللبن تاهوما جابداهم ! حتى البزازل لي واصلين تال الركبة كايعومو و كايتشمشو !سعداء فرحين.
زيرو مركب نقص
زيرو عقد
زيرو كبت
كاتحس بالبزازل كائنات حية ! عندها حقوق! كاتمتع بحق العومان فالبحر و حق التشماش ! كائنات عندها الحق تعوم فشاطئ عمومي في راحة و طمأنينة !
كاتشوف البزازل الاسبانية عندها حق عليك كمواطنة مغربية ! البزازل ديال تما عندهم الحق يعومو فبحر عمومي و يتشلبخو و يتشمشو و يدلكو و يدار ليهم لومبغ سوليغ باش يحميهم من الاشعة فوق البنفسجية ! و نتي دينمك انسانة كاملة الاهلية راشدة ماعندكش الحق تعومي بالمايو وسط شاطئ عمومي فبلادك و تشمشي و ديري لومبر بلا مايتلوطو عليك و لا يديرونجيوك و لا يشوفو فيك دوك الشوفات ديال ” هادي قحبة” ! و يتقبو ليك المايو بالليزر لي فعينيهم لي ماكايحميك منو لا لومبغ صوليغ لا مولاي بيه !
الدراري صغار كايعومو فالبحر مع امهاتهم ببزازلهم عريانين ! كايترباو وسط البزازل ! كايشوفو البزازل ! نورمال يكبرو شبعانين بزازل و علاقتهم سوية مع جسد المرأة !
ناس وصلو انهم يتحررو من ديك النظرة الدونية لجسد المرأة و انهم يتعايشو معاه بشكل عادي و صحي.
نتا دينمك من نهار فطموك ماعاودتي شفتي شي نهد ! نورمال تكون معقد من البزازل ! و كاتشوفهم خاصهم يتغطاو و يتخباو و مايبانوش فالزنقة ! فما بالك بالبحر ! نتا ماكرهتيش كون كانو البزازل و الترامي ديطاشي ! مفيسيين بالفيسات ! باش يبقاو العيالات يفكو الفيسات بطورنوفيس و يحطو بزازلهم فالدار و تراميهم و يخرجو للزنقة بلاش … ديك الساعة عاد غاتبرد و تهنا و تخليهم يتشاركو معاك الفضاء العمومي.
و دابا تاباش نلقا تصويرة لهاد المقال ! انا مضطرة نقلب على تصويرة ماكايبانوش فيها البزازل باش مانسيفطش نجيم للحبس!
الصراحة ! مورا هاد التبحيرا وسط البزازل لقيت راسي كانتمنى كون كنت بزولة نايضة فصدر شي سبليونية ! و لا غا ولسيسة نايضة فصدر شي دريرية عندها طناشرعام في طور التحول لبزولة …على الاقل غانكون ضامنة نشبع بحر و شمش و فيتامين دي.