الدرية باغا تجوج جاوها جوج الخطابا العزري و الشيباني.. الشيباني عندو الشركة و العزري فوق الميكة.. اللهم الشيباني ! تاع النخوة الشيباني ! اللهم الشيباني‎

—
مجموعة الفايف ستارز عندهم واحد الديسك زوين كايگولو فيه:
على زهر آ عيباد الله
على زهر آ عيباد الله
الدرية باغا تجوج
جاوها جوج الخطابا
العزري و الشيباني
الشيباني عندو الشركة
و العزري فوق الميكة
اللهم الشيباني ! تاع النخوة الشيباني ! اللهم الشيباني! هوا هاداك الشيباني! اللهم الشيباني
و كايسالي الديسك ب واحاه حاه وا حاه حاه وا حاه حاه !
بزاف ديال الناس عيبو على حنان فالأول ديال القصة ديالها تجوج براجل كبير عليها و شفت تعليقات من قبيل " آش داها تجوج براجل قد باها؟ " فحالا هاد الناس عايشين فالنرويج و ماعارفينش بلي الزلط يقدر يخلي بنادم يتجوج تا بغوريلا لا عندها الفلوس ! و شحال من مغربية كاتلقاها فباب السفارات ديال اوروبا جارة معاها شي شيباني ماقاد تايتمشى على ود الوريقات! شارف، مريض، مهلوك، و دافعاه و كاتبوسو و كاتگوليه شيغي موناموغ بقا نتا لبوك كاتهز فالحديد و تاكل فبيض البيض كي الحنش باش تعجب البنات و تا تا آلف ريال ماعندكش فجيبك.
و دابا فاش تصالحو و طالبات حنان الفيزازي باش يتزوج بيها و يطلقها و يعطيها المستحقات ديالها ! عاوتاني ناضو الناس كايغوتو علاش تطلب ليه الفلوس ! كاتبيع راسها !هادا تقحبين مشرعن.
ايه هذا تقحبين مشرعن و لكن أصلا،علاش غاتجوج وحدة عندها تسعطاشرعام براجل قد باها ؟
الجواب باين ! على الگرمومة ف99 فلميا ديال الحالات ( داك الواحد فلميا لي باقي كايدخلو فيه دوك البنات لي عندهم مشاكل نفسية و كايكونو باغين أب فحياتهم ماشغلناش فيهم).
حنان واخا بنت سبت گزولة و ماقارياش ولكن راها مرا تاهي ماكرهاتش شي عزري بوگوص وجهو مجبد ! شعرو كحل! مازال صغير فحالها ! يجري معاها ! و تبان بيه و بزينو قدام بنات الدوار .ولكن كأي مرا مطلقة فالعروبية لقات راسها طايحة فالدوزيام ديفيزيو ديال الرجال بزز منها، و الاختيار ديالها تقلص ، و مايمكنش ليها تطمع فداك العزري الزين لي غايبغي يدي وحدة عزبة و خاصها تحمد الله و تشكرو لاقبل عليها شي شيباني و خصوصا لاكان شيباني مسك عليه الله و هادشي لي كان ليها مع الفيزازي.
هوا شرا من عندها الزين و الصغر و داها تبوزا بيها قدام صحابو و جدد معاها الشباب و هي كان خاصها لي يتجوج بيها باش ماتبقاش معلقة ليها ديك البلاكة ديال مطلقة و يصرف عليها و يكسيها و بالمقابل تعطيه ينيك ! و على هاد الأساس تفاهمو و شفناهم فالطوموبيل غادين ضاحكين مفوجين كايشربو الما ديال سيدي حرازم.
هاد العلاقة كاملة مصلحة فمصلحة، بيزنس سميتو "زواج" ! و فاش كاتكون المصلحة هي أساس العلاقات مايمكنش تلوم شي طرف لي باغي مصلاحتو لأقصى حد ! داكشي علاش مايمكنش نلومو حنان اليوم حيت بغات المتعة ! بغات الگرمومة فواحد العلاقة لي مبنية من النهار الأول على الگرمومة.
و طول ما العيالات فالمغرب فحال حنان ماعندهمش واحد الاستقلالية مادية لي تخليهم يعزلو و يتخيرو شريك الحياة ديالهم بحرية تامة غادي يبقاو بزاف ديال البنات يتجوجو بالمرضى و الشراف و المكابيت و البسيكوباطات و يعيشو معاهم و يعطيوهم ينيكو فإطار اتفاقية النيك مقابل الغذاء.