ها علاش المجلس الوطني للصحافة ما يقدرش يبث فالشكايات اللي تقدمات ليه. 400 شكاية وجرائد ورقية ورقمية كتتسناها عقوبات من انذار حتى يحيدو الدعم ل3 سنوات

علاش لحد الان المجلس الوطني للصحافة ما عمرو خدا شي قرار بعد هاد المدة اللي بدا فيها خدمتو. من مهام هاد المجلس يصدر قرارات فالشكايات اللي كتوصلو من متضررين اشخاص او مؤسسات.السبب هو ان المجلس الوطني خاصو مصادقة الامانة العامة للحكومة على القانون الداخلي الخاص بيه. بلا هاد القانون الداخلي اللي بقى حاصل فالامانة العامة للحكومة٬ ما يمكنش للمجلس يدير شي حاجة.
وفق مصدر من المجلس ل”كود” فان هناك 400 شكاية توصلو بها لحد الان. هاد الرقم طبعا غادي ويكثر. فيها شكايات ضد صحف وجرائد رقمية. ضد كتابات حس بها من كتبت ضدو باللي سب وقذف فحقو.
المجلس بزز منو يبث فهاد الشكايات. هو يقدر يبث فقضايا بلا ما توصلو شكايات. من بعد ايلى ما بثش من حق اللي قدم الشكاية يمشي للقضاء: المحكمة الادارية.
يعني ان الدومين غادي يبدا يتنقى واللي مختص فالسب والقذف والمعيور. هاد العقوبات تقدر تمشي من الانذار باش ما يتكررش هاد الشي الى تتحيد بطاقة الصحافة للمقاولات او حتي منعها من الاستفاذة من الدعم العمومي لمدة 3 سنين.
هاد الشي غادي يخلي شي صحف ورقية او رقمية تحشم على عراضها. طبعا المجلس خاصو يدافع على الحريات على عدم التضييق على الصحافيين او متابعتهم فقضايا ما عندها علاقة بالصحافة بسباب مواقفهم ومقالاتهم.