ها الهدايا اللي خداتها ملكة اسبانيا من لمغاربة فمعرض مدريد للسياحة وها لمضاربة اللي وقعات بين اللبار وشي مستشار متهور فالسفارة وها اش قال البرلماني ل”كود”

ملكة اسبانيا طولات فالرواق المغربي فالمعرض الدولي للسياحة بمدريد
Publiée par GOUD sur Mercredi 22 janvier 2020
الملكة ليتيسيا اللي زارت الرواق المغربي فالدورة 40 للمعرض الدولي للسياحة بمدريد وطولات فيه ما مشاتش يدها خاوية. دوزات شي خمسة دقايق وما دارتهاش مع شي رواق اخر. الملكة عطاها المكتب الوطني للسياحة بحضور مديرو العام عادل بلفقير بعض الهدايا ديال صناعتنا التقليدية.
اللبار: ها اش عطيت لملكة اسبانيا من هدايا وها علاش تضاربت مع مستشار بالسفارة المغربية
Publiée par GOUD sur Mercredi 22 janvier 2020
لكن الهدية لكبيرة هي اللي عطاها عبد العزيز اللبار البرلماني ورئيس المجلس الجهوي للسياحة بفاس للملكة. ناض الصداع على قبال هاد الهدية. جا شي حد من مستشاري السفارة المغربية بمدريد وبعد اللبار من الصف باش ما يسلمش على السفارة. اللبار لبس طربوش حمر فيه فاس. وفي تصريحه ل”كود” قال باللي ما فهمتش علاش حيدوه كبرلماني ب4 ماندات ومنعش سياحي وجيب باغي نعطي كادو. وشرح اللبار ل”كود” اش وقع ليه “قلت لهادك السيد راها حشومة. ما خلاونيش وهي جات عندي وسلمات عليه. قلت ليها السيدة الملكة راه ديجا عطينا 3 هدايا للدون خوان كارلوس والملكة صوفيا”. اللبار قال انه عطى هدية ليهم عبارة عن باب كبير وصينية ديال الصناعة التقليدية مكتوب عليها “العلاقات المغربية الاسبانية كاينة وغادية تبقى”.
الملكة وفق اللبار ل”كود” قبلاتها وقالت اللي معاها جيبو لي الهدية.
واكد ل”كود” انه فديك الفترة طار ليه حقاش ما خلاوش يعطي الهدية وباللي باش خداتها الملكة رجع نشط.
للي وقع ان هاداك مستشار السفيرة دار بروطوكول ديالو وما كانش فيه باللي اللبار خاصو يسلم علي الملكة. تخلف وصافي. كيفاش تجي ملكة وما تسلمش علي المهنيين. اللبار كان عندو كيفاش يوصل وسلم عليها ووصل هداياه.
المشكلة دارها مستشار السفيرة فالمقابل كانت كريمة بنعيش السفيرة ولا عادل بلفقير المدير العام للمكتب الوطني للسياحة كلاص. وحاولو يتجاوزو هاد الشي