ففيديو جديد سارة جو كتشرح شنو وقع ليها: تكرفصو عليا فالعيادة الكورية وحسيت بالحريق فعظامي وشفت الموت بعينيا

حطات سارة جو، اليوتوبوز المغربية، فصفحتها الرسمية على “يوتوب” اليوم الأحد، فيديو كتوضح فيه شنو وقع ليها بالضبط فالعيادة الكورية للطب البديل، اللي كانت اتهمت المسؤولين عليها بأنهم تكرفصو عليها وتسببوا ليها فشلل نصفي فوالجه ديالها.
سارة، اللي فضلات تتكلم بالفيديو باللهجة المشرقية، بينات، بالصوت والصورة، آش جراليها فالعيادة، وكيفاش دقو ليها الخشب فلحمها، وعفط ليها الطبيب على ظهرها، وكيفاش كانت كتتألم فالوقت اللي كان فيه الطبيب والمترجمة اللي معاه كيقولوليها بللي “كَاع هذ الآلام طبيعية”.
بانت سارة دايرة “لورتيز” فالعنق ديالها، على أساس أن عندها كسور فيه، وقالت “لو أنني ماتقتش فيهم وماخليتهمش يديرو فيا مابغاو مكانش عنقي يولي داير هكذا”، وزادت كتقول بللي هذ الحقائق اللي ورات فهذ الفيديو ماشي كلشي، وبللي مزال غاتخصص فيديو آخر تتكلم فيه على حقائق أخرى خلات حاتها تتدهور بزاف.
من بعد ما دارت سارة تصوير بالأشعة فالعيادة الكورية، الطبيب خبرها، عن طريق مترجمتو المصرية، بللي عندها انحراف ففقرات العنق اللي يقدر يتسبب ليها فانزلاق غدروفي، وكذلك انحراف على مستوى عظلات الحوض، وهذشي خلعها بزاف، لكنها تشجعات وخاضت المغامرة، وخلات الطبيب يقوم بالمهمة اللي عليه، لكنها حسات بحريق قاصح بزاف، وب”الضغط” و”الموت” وبقات كتصبر راسها، وبانت خايفة ومالاليز.
وكانوا مجموعة من المعلقين هاجمو سارة جو، وقالوا ليها بللي هي ماجرا ليها والو أساسا، وبللي دايرة هذ المسرحية غير تبوحيط باش تتشهر كثر وتدير البوز.