قضية حمزة مون بيبي.. سيمو بنبشير دار أول تعليق من بعدما النيابة العامة صدرات مذكرة بحث لاعتقالو

شهرين من بعد بداية الاعتقالات والاستماع للمتورطين في قضية حسابات حمزة مون بيبي لي كان داير عصابة نصب وابتزاز واحتيال وسب وقذف، خرج سيمو بنبشير بأول تعليق على قضية التورط ديالو في الساعات الاولى من صباح اليوم الأحد.
وكتب سيمو لي مستقر في ميريكان “للتوضيح من هادشي كامل لي داير دابا. أنا متنعرفش عيشة عياش ومعندي معاها حتى علاقة، ولاكان شي اوديو ولا شي مكالمة هاتفية ولا أي اتصال كيما بغا يكون. الفرقة الوطنية غادي تجبدو”.
وكانت النيابة العامة صدرات مذكرة بحث لاعتقال سيمو بنبشير للاستماع ليه في القضية لي هزات الرأي العام ولي متابعين فيها المغنية دنيا باطمة وختها ابتسام في حالة سراح بعدما خلصو 80 مليون كفالة، ومتابعة فيها المصممة عيشة عياش في حالة اعتقال بعدما قرر اداعها في سجن لوداية في مراكش. وتم الحكم على سكينة گلامور واخرين بعامين ديال الحبس النافذ.
ومن نهار تفركَعات قضية حمزة مون بيبي، سيمو بنبشير مبقاش دخل للمغرب، وهادشي خلا الشكوك ضدو تزيد تكبر.