مجموعة منهم مروحين.. الناس اللي كيعرفو المغربي المصاب ب”كورونا” غيديرو اليوم التحليلات.. ودارو الحالات المشتبه فيها فالحجر الصحي

علمت “كود” من مصدر طبي من المركز الاستشفائي مولاي يوسف فكازا بللي طاقم من الأطباء غادي يجري اليوم مجموعة من التحليلات لعائلة المصاب بفيروس كورونا وكَاع الناس اللي كانوا معاه فالطيارة أو اللي تلاقاو بيه، فالوقت اللي تم وضع الناس القراب ليه فالحجر الصحي فالمستشفى نفسو.
المصدر أكد ل”كود” أن بعض هذ الناس فيهوم أعراض ديال الرواح والسخانة، وهذشي علاش جراو يديرو ليهم التحليلات اليوم باش يعرفوا واش تقاسو بالفيروس أو أن الأعراض كتتعلق بحساسية أو نزلة برد عابرة، وغاتسافط اليوم نيت لمعهد باستور، ونتائجها غاتخرج هذ العشية.
مصدر “كود” أكد بللي المصاب، وهو مهاجر مغربي كيعيش فشمال إيطاليا، الحالة ديالو مستقرة، وكاين أمل كبير فأنه يتشافى من الفيروس من بعد إخضاعو للرعاية الطبية اللازمة.
وللإشارة، “كورونا” المستجد كيقتل العشرات عبر العالم بشكل يومي، منهار بان أول مرة فالشينوا اللي تجاوز عدد الوفيات فيها بسبابو 2900 حالة لحد الآن.
وزارة الصحة طمانات المغاربة هذ الصباح فندوة صحافية ليها بعد تسجيل أول حالة للإصابة بالفيروس فالمغرب، وأنها كتدير كَاع جهدها باش تراقب جميع نقاط العبور وتتبع الحالات اللي رجعو من الدول الموبوئة.