الميركاتو التلفزيوني. الرمضاني بدا التداريب اليوم واشاعات سبقاتو على ثمن التوقيع

الصحافي المعروف رضوان الرمضاني بدا مع تداريب اليوم مع “دوزيم”.
مقدم “بدون لغة خشب” على إذاعة “ميد راديو” بدا، اليوم الثلاثاء، على حساب ما علمتو “كود”، التدريب في أستديو القناة الثانية على برنامجه السياسي الذي يدخل ضمن سلسلة من الإنتاجات الجديدة التي ينتظر أن تطلقها “دوزيم” في القريب.
البرنامج يقدر يكون اسمو “مع الرمضاني” حسب مصادر من قناة عين السبع ل”كود”.
وأخذ رضوان الرمضاني أول خطوة في مسار هذه التجربة الجديدة مع “دوزيم” واخا مازال ما وقعش وفق مصدر “كود” العقد معاها. التوقيع ما غاديش يكون بين الرمضاني وبين دوزيم بل بين شركة غادي يصايبها وبين القناة. اشاعات كانت انتشرات باللي العقد فيه 40 الف درهم للشهر. واخا مبلغ عادي فالتلفزيون فان مسؤول بالقناة نفى ل”كود” هاد المبلغ وقال ان الرقم اقل بكثير، مقرب من الرمضاني قال ل”كود” نفس الشيء واكد ان اللي كيهمو دابا هو يدير برنامج ويكون ناجح وباللي لفلوس ماشي هي همو دابا.
ووقع الاختيار على الرمضاني من قبل إدارة قناة عين السبع بعدما رأت فيه البروفيل المناسب لتقديم برنامج سياسي يكون “أكثر جرأة”.
يشار إلى أن رضوان الرمضاني خريج المعهد العالي للصحافة والإعلام، ويشغل حاليا منصب مدير الأخبار بإذاعة (ميد راديو).
وغادي يبقى فهاد المنصب فالإذاعة وغادي يستثمر فتقديم برنامجو.