دوزيم كتفاوض الرمضاني فالميركاطو.. وصحافيو القناة للمدير: ديها فينا حنا

علمت “كود” ان إدارة قناة “دوزيم” تفاوض هاد ليام الصحافي المعروف رضوان الرمضاني مدير الاخبار بميد راديو مقدم اشهر برامج الاذاعة باش يجي يدير برنامج سياسي. مصادر “كود” من القناة أكدت الخبر واوضحت ان البرنامج غادي يكون فحدود نص ساعة وكيهم السياسة.
وفق مصادر “كود” فان الفريق المفاوض باش يجيبو الميركاطو القادم مكون من مدير القناة سليم الشيخ وحتى مسؤولين خراين.
المدير العام فدوزيم ما غاديش يطير الرمضاني من الإذاعة طبعا. مصدر “كود” قال باللي ربط الاتصالات بمولاي احمد الشرعي واستأذنو قبل ما يدير اول اتصال وباللي غادي يكون متعاون ويستمر فبرنامجو ومسؤولياته بحال داك الشئ اللي كيديروه صحافيين ففرانسا.
صحافيو دوزيم كيف اكد ل”كود” بعضهم طالع ليهم الدم. باغيين تعطاهم فرصة “حنا ماشي ضد اي صحافي يجي. ولكن تعطى الفرصة للكفاءات اللي كاينة ويجيبو اللي بغاو. بغينا برامج بغينا نديرو أمور كثيرة” يؤكد الصحافي ل”كود”.
الميركاطو دابا مازال ما تحسمش. مازال فطور المفاوضات. دوزيم تحتاج لتدبير اخر بعد رحيل سميرة سيطايل. خاص كاع اللي كان تابع ليها يمشي فحالو او يبعد على المسؤولية. استمرار هادوك بحال رضى بنجلون غادي يزيد يسمم الأوضاع فقتاة كتعيش أزمة.