المجلس الوطني للصحافة كيراسل الداخلية والبوليس باش الصحافيين يخرجو للتغطيات الميدانية.. ومجاهد ل"كود": الصحافيين عنصر أساسي فالأزمة وخاص السلطات يخليوهم يشتغلو

سافط المجلس الوطني للصحافة كل من وزير الداخلية، عبد الوافي الفتيت، ومدير المديرية العامة للأمن الوطني، عبد اللطيف الحموشي، مراسلة، كيلتلمس فيها باش يسمحو للحاملين لبطائق الصحافة باش يتحركو بيها لتغطية الأحداث المهمة وتقصي الأخبار.
والداخلية كانت علنات لبارح بللي حالة الطوارئ الصحية غاتكون اليوم مع 6 دالعشية، وبللي الخروج من بيون غايولي ممنوع إلى بترخيس من السلطات المحلية، وهذ الأمر كيستثني عناصر الأمن والدرك والقوات المساعدة والسلطات الأخرى، مادام هذ العناصر كيتوفرو على البطاقة.
وفهذ الإطار، المجلس طلب من الداخلية والأمن الوطني باش تخلي الصحافيين يقومو بالمهام ديالهم كذلك إلى كانو كيحملو البطاقة المهنة الرسمية اللي عطاها ليهم المجلس.
فهذ الصدد قال يونس مجاهد، رئيس المجلس الوطني للصحافة، بللي خاص الصحافيين يشتاغلو بحرية، "مساهمة منهم فالعمل الوطني وفالإخبار، لأن الصحافيين كيلعبو دور أساسي فالعمل المهني اللي مبني على الخبرة والكفاءة"، على حد تعبيرو.
وزاد مجاهد كيقول، فتصريحو ل"كود"، بللي "ضروري خاصهم يبقاو يخرجو ويشتغلو، لأنهم ضروري يخرجو يديرو تغطية للأحداث، ويمشيو للندوات الصحافية ويتقصاو الأخبار، دورهم أساسي فالخبر الصادق والموثوق به والجدي، إذن خاصهم يبقاو يتحركو، بحالهم بحال الفئات الأخرى اللي كاتحرك فهذ الأزمات"، على حساب هضربو.
واكد مجاهد بللي الخدمة دالصحافيين فعز الازمة مهمة، بحالها بحال خدمة البوليس والعسكر والسلطات، حيت كيلعبو دور مهم فنقل المعلومات فالعالم كلو وماشي غير فالمغرب.
"التواصل والإعلام مسالة أساسية فمحاربة الوبا ، هذ العملية هذي خاصها المهنيين هوما اللي يقومو بيها، استنادا على تعاملهم مع البلاغات الرسمية، والتجاوب مع المسؤولين الرسميين، وتغطية الندوات الصحافية، والتواصل مع الخبراء، حيت هوما جسد أساسي فازمات بحال هذي"، كيوضح مجاهد.
وقال بللي محاربو الوباء كتكون من خلال الخبر المهني، وتكذيب الإشاعات، والتواصل مع مصادر القرار، وبرز بللي هذ الدور محوري بحال دور المساعدين فقطاع الصحة فالأزمة.